Halldór B. Halldórsson mætti með myndavélina á Fagmannakvöld Miðstöðvarinnar föstudaginn 6. nóvember. Hann fangaði stemninguna og ræddi við Marinó Sigursteinsson, pípulagningameistara og einn eigenda Miðstöðvarinnar, um sögu fjölskyldufyrirtækisins og mikilvægi þess að versla við fyrirtæki í Eyjum.

Lærði pípulagnir hjá föður sínum

Marinó er þriðji ættliðurinn sem rekur fyrirtækið. Í viðtalinu segist hann enn eiga dagbók afa síns frá árinu 1932, þegar afi hans var að stíga sín fyrstu skref í faginu. Afinn, Sigurvin Marinó Jónsson, stofnaði fyrirtækið árið 1940 og rak það fyrst undir eigin nafni. Árið 1950 fékk það nafnið Miðstöðin.

Sigursteinn Marinósson tók síðar við rekstrinum af föður sínum. Marinó var tíu ára þegar afi hans lést og lærði sjálfur pípulagnir hjá föður sínum. Þannig gekk iðnin milli kynslóða innan fjölskyldunnar.

Fagmannakvöldið á rætur í þorrablóti

Marinó segir að Miðstöðin hafi byrjað að halda þorrablót fyrir um 30 árum. Þegar lagerinn stækkaði var ekki lengur pláss fyrir blótið og samkoman tók á sig nýtt form. Úr varð Fagmannakvöldið, þar sem gestir geta kynnt sér vörur og búnað. Marinó segir þátttökuna hafa verið góða á föstudaginn og að kynningarnar nýtist gestum oft síðar, þegar þá vantar verkfæri eða efni í tiltekið verk.

Hvetur Eyjamenn til að versla heima

Þegar Halldór spyr hvað geri Vestmannaeyjar að góðum stað til að reka fyrirtæki nefnir Marinó traustið milli fyrirtækisins og viðskiptavinanna. Hann segir stuðning Eyjamanna hafa gert Miðstöðinni kleift að vaxa og byggja upp vinnustað þar sem nú starfa 25 manns.

Skilaboð Marinós til fagmanna og bæjarbúa eru að hlúa að fyrirtækjum í Eyjum með því að beina viðskiptum sínum til þeirra. Í lok viðtalsins hvetur hann fólk til bjartsýni og þakkar starfsfólki Miðstöðvarinnar fyrir framlag þess í gegnum árin. Myndabandið má sjá hér að neðan.