Kvennalið ÍBV í handbolta vann sannfærandi 27–21 sigur á Stjörnunni þegar liðin mættust í 8. umferð Olís deildar kvenna í Vestmannaeyjum í dag. Þetta var sjötti sigur Eyjakvenna í röð, en þær sitja í öðru sæti deildarinnar.

Eyjakonur settu tóninn strax í upphafi leiks og komust í 4–0 eftir tæplega átta mínútna leik. Þegar 20 mínútur voru liðnar var staðan 8–4. ÍBV hélt áfram að hafa yfirhöndina og leiddi með sjö mörkum í hálfleik, 13–7.

Eyjakonur héldu uppteknum hætti í síðari hálfleik og höfðu áfram góð tök á leiknum. Stjarnan náði þó að minnka muninn í fjögur mörk á upphafsmínútum hálfleiksins, 14–10.

ÍBV náði aftur góðu forskoti og leiddi með sex mörkum, 20–14, þegar stundarfjórðungur var til leiksloka. Stjörnukonur minnkuðu muninn í þrjú mörk, 23–20, þegar skammt var eftir en komust ekki nær. ÍBV hélt forystunni og fagnaði að lokum sex marka sigri. Lokatölur 27–21.

Sandra Erlingsdóttir átti stórleik í liði ÍBV og var markahæst með 16 mörk. Ólöf Maren Bjarnadóttir varði 11 skot í marki heimakvenna.

Með sigrinum er ÍBV áfram í öðru sæti deildarinnar með 14 stig, tveimur stigum á eftir toppliði Hauka. Stjarnan situr hins vegar á botni deildarinnar með tvö stig.

Mörk ÍBV: Sandra Erlingsdóttir 16 mörk, Amelía Dís Einarsdóttir 3, Alexandra Ósk Viktorsdóttir 2, Andrea Jacobsen 2, Birna Dögg Egilsdóttir 1, Birna María Unnarsdóttir 1, Kristrún Ósk Hlynsdóttir 1, Lilja Kristín Svansdóttir 1.

Leikir dagsins í Olís deild Kvenna:

• 15:00 Selfoss – KA/ÞÓR
• 15:00 Valur – HK