Fimleikafélagið Rán, Skotfélag Vestmannaeyja og Sundfélag ÍBV fengu samtals 1.050.000 krónur úr Hvatasjóði íþróttahreyfingarinnar. Rúmur helmingur fjárins sem kom í hlut Suðurlands í nóvemberúthlutun sjóðsins fór til verkefna í Vestmannaeyjum.

Fimleikafélagið Rán fékk 400.000 krónur fyrir verkefnið Fimleikar til framtíðar. Skotfélag Vestmannaeyja fékk sömu upphæð fyrir kynningarnámskeið í skotfimi fyrir börn og ungmenni. Sundfélag ÍBV fékk 250.000 krónur fyrir verkefnið Öll í sund.

Samkvæmt tilkynningu UMFÍ frá 6. nóvember fengu sjö verkefni á Suðurlandi samtals 2.050.000 krónur. Auk Eyjafélaganna fengu Hestamannafélagið Kópur, Hestamannafélagið Sindri, Ungmennafélagið Ás og Ungmennafélagið Hvöt 250.000 krónur hvert. Verkefni Hvatar nefnist Hraust ungmenni.

Á landsvísu fengu 57 verkefni samtals 26 milljónir króna. Hvatasjóðurinn er á vegum ÍSÍ og UMFÍ með stuðningi mennta- og barnamálaráðuneytisins og styrkir verkefni sem auka þátttöku barna og ungmenna í íþróttum.