Arnar Pétursson mun verða í þjálfarateymi kvennaliðs Fram á komandi keppnistímabili í Olís deildinni.

Fréttavefur RÚV greinir frá að Rakel Dögg Bragadóttir verði næsti þjálfari liðsins í handbolta og segir jafnframt frá því að hún verði með landsliðsþjálfarann, Arnar Pétursson sér við hlið. Munu þau skrifa undir samninga við Fram síðar í dag, samkvæmt heimildum RÚV.

Arnar Pétursson stýrði íslenska kvennalandsliðinu á heimsmeistaramótinu í lok síðasta árs. Undir hans stjórn er Ísland svo komið með þátttökurétt á Evrópumótinu í Austurríki, Sviss og Ungverjalandi í lok þessa árs. Þetta eru fyrstu tvö stórmót íslenska kvennalandsliðsins frá árinu 2012.

Arnar æfði og spilaði með yngri flokkum ÍBV og hóf sinn meistaraflokksferil þar en spilaði einnig með Stjörnunni, FH og Haukum áður en hann fluttist aftur til Vestmannaeyja og tók við þjálfun ÍBV. Hann tók við liðinu í neðri hluta 1. deildar og undir stjórn Arnars varð ÍBV deildarmeistari í 1. deild 2013, Íslandsmeistari 2014 og deildar-, bikar- og Íslandsmeistari 2018.

Nánar má lesa um málið hér.