Bandaríska knattspyrnukonan Allison Lowrey hefur skrifað undir samning við knattspyrnudeild ÍBV og mun leika með liði meistaraflokks kvenna í Lengjudeildinni í sumar. Fram kemur í frétt á heimasíðu ÍBV að samningur Allison sé til loka tímabils en hún kemur til ÍBV frá Texas A&M eftir að hafa einnig leikið með háskólaliði Rutgers.

Allison er 22 ára sóknarmaður og hafði Jón Ólafur Daníelsson þjálfari ÍBV, þetta um hana að segja. „Hún er kraftmikill framherji sem lætur finna vel fyrir sér. Allison skorar mörk í öllum regnbogans litum, hvort sé með hægri eða vinstri fæti eða með skalla. Hún leggur líka upp mörk fyrir samherja sína, enda með mjög góðan leikskilning og nákvæmni í sendingum. Þá er Alisson mjög vinnusöm inni á vellinum.“

Knattspyrnuráð hlakkar til samstarfsins við Allison en hún er væntanleg til Vestmannaeyja fyrir lok janúar.