Halldóra Kristín, fasteignasali Húsfasteignar í Eyjum, hefur markað spor sín á fasteignamarkaðinn með árangursríkri nálgun, en hún hefur meðal annars nýtt samfélagsmiðla á borð við TikTok til að sýna fasteignirnar sínar á lifandi hátt.

Halldóra oftast kölluð Dóra, byrjaði fyrir rúmum 3 árum í bransanum, en á þessum árum hefur henni þótt markaðurinn afar líflegur. ,,Þó svo að eftirspurn og framboð sveiflist auðvitað hefur aldrei komið eitthvað algjört frost.“ segir Dóra.  Síðasta ár var að hennar sögn gott í sölu og janúar mánuður síðastliðinn hefur farið af stað með hvelli, mikil hreyfing á markaðnum.

Aðspurð hvernig hún sjái fyrir sér þróunina á fasteignamarkaðnum hér í Eyjum telur Dóra að verð muni smám saman halda áfram að hækka og eftirspurn aukast, en bætir við að það verði í raun bara að koma í ljós, það sé ýmislegt sem spili þar inn í og erfitt að segja hvernig þróunin verður.

Hvers konar fasteignir eru vinsælastar í dag að mati Dóru? ,,Ég er búin að vera að selja mest af minni og ódýrari eignum, mikið af fyrstu kaupendum. Dýrari eignir hafa staðið aðeins og getur verið að hátt vaxtastig sé orsök þess, fólk er ekki endilega tilbúið að taka há lán í þessu vaxtaumhverfi. Þetta stendur vonandi til bóta ef vextir halda áfram að lækka.“

En eru einhverjir ákveðnir tískustraumar í gangi í dag þegar kemur að innanhússhönnun? ,,Svo sem ekki, það eru þó nokkrir hlutir sem eru mjög víða á íslenskum heimilum í dag, eins og t.d. Besta-skápar frá Ikea, hring speglar, gegnsæjar hvítar gardínur og þess háttar. En svo er stíll fólks mjög misjafn, sumir vilja hafa allt dökkt en aðrir eru meira fyrir ljóst, svo það er eiginlega bara allur gangur á þessu.“

Hvaða praktísku ráð myndi Dóra gefa fólki sem er að selja eignir í dag? ,,Kannski helst að reyna að hafa eignina snyrtilega. Ef það er eitthvað sem þarf að laga sem er ekki kostnaðar eða tímafrekt borgar sig stundum að klára það.“

Hér má sjá innlit í eina af fasteignum Húsfasteingar í Eyjum, sem birt var á samfélagsmiðlinum Tiktok.