Vestmannaeyjabær boðar til íbúaþings um atvinnustefnu þriðjudaginn 13. október. Þingið verður haldið í Eldheimum og hefst klukkan 17:15.

Bærinn vinnur nú að mótun atvinnustefnu fyrir Vestmannaeyjar. Markmiðið er að móta skýra framtíðarsýn fyrir atvinnulíf í bænum og styrkja samkeppnishæfni og fjölbreytni atvinnugreina.

Samkvæmt tilkynningu á vef bæjarins verður á íbúaþinginu rætt um stöðu atvinnumála í Vestmannaeyjum og helstu tækifæri og áskoranir til framtíðar. Ætlunin er að skapa vettvang fyrir uppbyggilegt samtal og kalla fram hugmyndir og sjónarmið sem nýtast við mótun stefnunnar.

Íbúar eru hvattir til þátttöku svo sem flestar raddir heyrist. Lögð er áhersla á að atvinnustefnan endurspegli áherslur og stuðning Vestmannaeyjabæjar við fjölbreytta atvinnustarfsemi í bæjarfélaginu.

Samhliða íbúaþinginu stendur yfir rafræn könnun þar sem íbúar, atvinnurekendur og aðrir sem tengjast samfélaginu geta komið sjónarmiðum sínum á framfæri. Könnunin er nafnlaus og svarfrestur er til og með 20. október. Eyjafréttir fjölluðu áður um könnunina og þar má nálgast hlekk til þátttöku.