ÍBV hefur samið við forráðamenn spænska félagsliðsins Costa del Sol Málaga um að báðir leikir liðanna í átta liða úrslitum Evrópubikarkeppni kvenna í handknattleik verði leiknir í Málaga. Vilmar Þór Bjarnason, framkvæmdastjóri handknattleiksdeildar ÍBV staðfesti þetta við handbolta.is.

Leikirnir fara fram 12. og 13. febrúar í Polideportivo Ciudad Jardin, íþróttahöll Costa del Sol Málaga-liðsins.

Costa del Sol Málaga situr í fjórða sæti úrvalsdeildar kvenna á Spáni með 18 stig að loknum 12 leikjum eins og Gran Canari sem einnig er eftir í keppninni. Kanaríeyjaliðið dróst gegn þriðja spænska liðinu sem er eftir í keppninni, Elche frá Alicante sem sló Íslands- og bikarmeistara KA/Þórs út í 32-liða úrslitum í byrjun vetrar.

ÍBV-liðið hefur farið í gegnum þrjár umferðir í keppninni til þessa. Fyrst mætti liðið PAOK frá Grikklandi í tveimur leikjum ytra, síðan tóku við heimaleikir við Panorama frá Grikklandi í 32-liða úrslitum og tékkneska liðið Sokol Pisek í 16-liða úrslitum í byrjun ársins. Af sex leikjum hefur ÍBV unnið fimm en tapað einum, fyrri leiknum við PAOK ytra í lok október.