Eyjamenn byrjuðu frábærlega þegar þeir mættu Íslandsmeisturum Víkings á útivelli í dag. Voru komnir með tveggja marka forystu strax á sautjándu mínútu með mörkum Andra Rúnars (11. mínútu.) og Arnars Breka (17. mínútu). Á 28. mínútu skoruðu Víkingar og þannig var staðan í hálfleik.

Á 40. mínútu missti ÍBV mann af velli en einum færri tókst þeim að verjast heimamönnum fram á fimmtu mínútu uppbótartímans. Þá brustu varnirnar og niðurstaðan 2:2 jafntefli í hörkuleik.

ÍBV er áfram í níunda sæti með 19 stig og með þriggja stiga forskot á FH sem gerði markalaust jafntefli gegn Leikni sem ásamt ÍA situr á botni deildarinnar með 14 stig.

ÍBV á tvo leiki eftir daginn í dag, Fram á heimavelli og Breiðablik á útivelli í síðustu umerðinni.

Myndina tók Sigfús Gunnar á leik ÍBV og Stjörnunnar á Hásteinsvelli síðasta sunnudag. Þar höfðu Eyjamenn betur.