„Hugsunin með Jólahvísli er að allir geti komið á jólatónleika óháð fjárhag og þess vegna er frítt inn, við elskum þennan tíma, aðventuna og jólin. Boðskapur jólanna er það besta sem okkur öllum hefur verið gefið. Jesús kom með von, frið og frelsi sem varir enn,” segir Helgi Tórshamar í samtali við Eyjafréttir en í kvöld verður boðið upp á Jólahvísl í áttunda sinn í Hvítasunnukirkjunni.

„Fyrsta Hvíslið var haldið þann 22. desember 2016 svo þetta eru áttundu tónleikarnir, við þurftum að sleppa þeim einu sinni út af dálitlu,” segir Helgi.

Spurður hvort tónleikarnir í kvöld verði með svipuðu sniði og undanfarin ár, svarar Helgi því játandi. „Þetta eru lágstefndir tónleikar, ljúfir og þægilegir, gefa frið og ró í hug og hjarta. Tuttugu manns hafa komið að undirbúningi, fimm í hljómsveit, átta söngvarar og allskonar hjálparhellur sem við erum óendanlega þakklát fyrir. Við hlökkum til að sjá ykkur öll og við óskum ykkur gleðilegra jóla. Þetta er gjöf frá okkur til ykkar. Við viljum góðfúslega benda á styrktarsjóð Landakirkju fyrir þau sem vilja láta gott af sér leiða á tónleikunum. Tekið verður á móti framlögum og einnig hægt að millifæra á  rn: 0133-15-00759 Kt: 630321-0340.”

Óskar Pétur Friðriksson leit við á æfingu hópsins í gærkvöldi. Tónleikarnir í kvöld hefjast klukkan 20.30 í Hvítasunnukirkjunni.