Sigurður VE er nú í viðhaldsstoppi. Að sögn Eyþórs Harðarsonar, útgerðastjóra Ísfélagsins er skipið í hefðbundnum slipp á Akureyri þar sem ýmisar lagfæringar eru gerðar. Í liðinni viku kviknaði í um borð í skipinu.

„Það varð laus eldur í vélarrúmi skipsins við suðuvinnu í lagnakerfi, en sem betur fer fór slökkvikerfi skipsins í gang og slökkti eldinn áður en skemmdir urðu á búnaði, en einn starfsmaður fékk vott af reykeitrun skilst mér.“

segir Eyþór. Hann segir að meðal verka sem unnin séu er að yfirfara stýrisbúnað og einnig öxuldraga skrúfuásinn.

„Þetta tekur allt lengri tíma en við vonuðumst til, en það er ekki í fyrsta skiptið sem slippvinna dregst eitthvað vegna ófyrirsjánlegra verkefna í undirbúningi slippsins. Við stefnum á að hefja makrílvertíð fljótlega í júlímánuði og frystihúsið í Eyjum opnar 8. júlí til að taka á móti makríl. Vonandi verður Sigurður klár til makrílveiða á þeim tíma.“

Þorgeir Baldursson, ljósmyndari tók meðfylgjandi myndir af Sigurði í slippnum á Akureyri.