Á Háaloftinu í dag ríkti sannkölluð jólagleði þegar jólasýningin „Jólasveinar ganga um gólf“ var sett á svið. Börn fylltu salinn, margir í jólaklæðum og tóku fagnandi á móti sveinunum sem gengu um gólf, sungu með krökkunum og skemmtu með ljúfum jólabröndurum og stuttum sögum.

Sýningin er skemmtilegur hluti af aðventunni í Vestmannaeyjum, þar sem yngstu gestirnir fá að upplifa jólaandan á skemmtilegan og lifandi hátt. Foreldrar og fjölskyldur nutu þess ekki síður – og margir tóku undir í söngnum þegar klassísk jólalög fylltu Háaloftið.

Næstu sýningar fara fram 20. og 21. desember, allar kl. 14:00 (húsið opnar 13:30). Miðaverð er 2.500 krónur og sala fer fram á tix.is. Hér fyrir neðan má sjá myndasyrpu og myndbönd frá sýningunni í dag – sem sýna vel þá notalegu jólastemningu sem ríkti á Háaloftinu.