Eftir jólin fann Margrét Rut fyrir yfirþyrmandi tilfinningu þegar nýir hlutir fylltu heimilið og skapaði það álag að finna þeim pláss. Hún eins og margir aðrir, á miklu fleiri hluti en hún raunverulega notar eða hefur þörf fyrir og það tók það bæði pláss og orku. Að eigin sögn er þetta ekki fyrsta sinn sem hún hefur fengið hreinlega nóg af hlutunum á heimilinu eftir jólin og segist hún taka yfirleitt heimilið í gegn hvert ár og losa sig við hluti. En núna í janúar langaði henni að taka þetta skrefinu lengra. Hún ákvað að spjalla við gervigreindina (ChatGPT) um þessa hugmynd sína og hvort hún væri til í að útbúa plan fyrir sig þar sem hún tæki allt heimilið í gegn, eitt svæði í einu. ,,Mig langaði að einfalda líf mitt, skipuleggja heimilið betur. Ég lét útbúa sérsaumað plan fyrir heimilið mitt og þetta varð mjög spennandi og ekkert annað í stöðunni en að byrja.“

Margrét hefur deilt þessu ferðalagi með fylgjendum sínum á Instagram og veitt mörgum innblástur til að fara í svipaða áskorun. Við fengum tækifæri til að ræða við hana og fá innsýn í ferlið.

Er eitthvað sem hefur komið þér á óvart við ferlið hingað til?

Já, mér fannst stundum erfitt að sleppa takinu á sumum hlutum, jafnvel þó ég hafi ekki notað þá í langan tíma. Ég hélt einnig að þetta yrði auðveldara með dögunum sem liðu en það er dagamunur á því hversu miklu stuði ég er í fyrir að losa mig við hluti.

Hvaða svæði á heimilinu hafa verið erfiðust þegar kemur að því að losa?

Ég er ekki búin að fara í gegnum allt heimilið en ég ímynda mér að það verður mjög erfitt að fara yfir fataskápana. Ég á t.d. mikið af fötum sem ég held að ég mun nota „einhvern daginn,“ en í raun hef ég ekki klætt mig í þau í mörg ár. Einnig eru persónulegir hlutir eins og minjagripir og gjafir frá öðrum frekar krefjandi, því það fylgir þeim oft tilfinningalegt gildi. Það getur verið erfitt að meta það hvort ég muni sakna einhvers. Ég vil nefnilega ekki losa mig við hluti ef ég þarf svo að kaupa þá aftur einhvern tímann seinna. Þá væri þetta verkefni tilgangslaust.

Hvaða aðferð notar þú til að taka ákvörðun um hverju skal henda og hverju skal halda?

Ég reyni að vera raunsæ og spyr mig: „Hef ég notað þetta síðasta árið? Myndi ég kaupa þetta aftur ef ég ætti það ekki núna?“ Ef svarið er nei, þá fer hluturinn, ekki nema það sé einhver ástæða fyrir að geyma hann frekar. Ég nota líka þá reglu að ef eitthvað hefur verið geymt í kassa eða inni í skáp án þess að ég hafi saknað þess, þá þarf ég líklega ekki að halda því.

Hefur þetta ferli breytt kauphegðun þinni eða hvernig þú lítur á neyslu á einhvern hátt?

Bæði og, ég hef lítið haft gaman af mikilli neyslu og vil ekki eiga of mikið af hlutum sem ég þarf ekki á að halda, en ég er með veikan blett þegar það kemur að gömlu skrani, plöntum og fallegu leirtaui. Ég reyni líka að velja gæði umfram magn og kaupa frekar hluti sem endast lengi frekar en að láta undan hvatakaupum.

Þeir sem vilja fylgjast með Margréti Rut í áskoruninni geta fylgst með henni á Instagram undir margretrafns.