Á fundi fjölskyldu- og tómstundaráðs á fimmtudaginn fór deildarstjóri velferðarmála hjá Vestmannaeyjabæ yfir stöðu barnaverndarþjónustu árið 2024.

Fram kemur að tilkynningar hafi aldrei verið eins margar eða 306 tilkynningar sem bárust barnaverndarþjónustu Vestmannaeyja árið 2024. Flestar tilkynningar voru um vanrækslu gagnvart barni eða um 157.  Tilkynningar sem bárust um áhættuhegðun barns voru 93 og 56 um ofbeldi gagnvart barni. Málum barna með fjölþættan vanda er að aukast og þyngjast, mikilvægt er að ríkið komi til móts við úrræði er varðar þann málaflokk.

Þá segir að verið sé að vinna að nýrri framkvæmdaáætlun barnavernarþjónustu, búa til og efla úrræði í heimabyggð, samþætta þjónustu og efla forvarnir og fræðslu enn frekar í samstarfi við aðrar stofnanir er vinna með börnum.