- Eyjafréttir
- ·
- Fréttir
- ·
Nýtt skip í þriggja mánaða viðgerð í Noregi
Sigurður VE 15, stærsta skip Ísfélagsins sem kom nýtt til landsins í sumar, er væntanlegt til heimahafnar í Vestmannaeyjum á næstunni eftir viðgerð í Noregi. Alvarleg bilun kom upp í spilkerfi Sigurðar í byrjun september og því hefur viðgerðin í Noregi tekið þrjá mánuði, upphaflega var áætlaður viðgerðartími tvær til þrjár vikur.
Eyþór Harðarson, útgerðarstjóri Ísfélags Vestmannaeyja segir að stefnt sé að því að sigla skipinu frá Egersund í Noregi á næstu dögum. Eyþór vill ekki fara nánar út í hvers eðlis bilunin var. Hann segir í samtali við Eyjafréttir að áhöfnin hafi leyst af á öðrum skipum félagsins og sinnt verkefnum í tengslum við viðgerðina í Noregi þennan tíma. Allir hafi haft vinnu þrátt fyrir þetta stopp.
Nánar er fjallað um málið í næsta tölublaði Eyjafrétta sem kemur út síðar í dag, miðvikudag.
