Íris Róbertsdóttir, bæjarstjóri, gerði grein fyrir endurskoðuðum ársreikningi Vestmannaeyjabæjar fyrir árið 2024 í framsögu á fundi bæjarstjórnar í vikunni, en þá fór fram seinni umræða um ársreikninginn. Auk þess fór bæjarstjóri yfir helstu niðurstöður reikningsins. Engar tölulegar breytingar voru gerðar milli umræðna en textaskýringar voru yfirfarnar og lagfærðar þar sem við átti.

„Íþyngjandi stóraukin skattheimta á sjávarútvegsbyggðir”

Í bókun bæjarfulltrúa D lista segir að bæjarfulltrúar Sjálfstæðisflokksins ítreki bókun sína við fyrri umræðu og telja mikilvægt að hagræða eins og frekast er unnt í rekstri og að hemja vaxandi útgjöld sveitarfélagsins til að geta mætt fjárfrekum fjárfestingum og dýru viðhaldi sem ljóst er að sveitarfélagið mun þurfa að ráðast í á næstu árum.

Íþyngjandi stóraukin skattheimta á sjávarútvegsbyggðir mun setja þungar byrðar á Vestmannaeyjar sem standa undir stórum hluta veiðigjalda landsins og skapar öllu íslensku samfélagi mikilvægar tekjur. Ljóst er að þær verða í minna mæli eftir þar sem þær eru skapaðar verði núverandi ríkisstjórn að ósk sinni. Sá gjörningur er framkvæmdur á sama tíma og ríkið keppist við að setja sveitarfélögum lagalega bindandi kvaðir um aukna kostnaðarsama þjónustu, á borð við gjaldfrjálsar skólamáltíðir, jafnlaunavottanir og persónuverndarlöggjöf án þess að fjármagn til að standa undir slíkum breytingum fylgi.

Slíkar ákvarðanir hafa og munu áfram setja mark sitt á rekstur sveitarfélaga og er mikilvægt að hafa m.a. fyrirsjáanlegt tekjutap í sjávarútvegi vegna aukinna veiðigjalda í huga við áætlanagerðir framtíðarinnar. Að sama skapi setja nýir kjarasamningar og mikil óvissa á alheimsmörkuðum stór spurningamerki við framtíðarhorfur í rekstrarumhverfi sveitarfélaga. Því er mikilvægt að sveitarfélagið sé vel í stakk búið til að takast á við mögulegar áskoranir sem því fylgja, segir í bókun minnihlutans.

„Framtíð Vestmannaeyja getur verið björt þrátt fyrir miklar áskoranir”

Í bókun bæjarfulltrúa E og H lista segir að afkoman á árinu 2024 sé góð – niðurstaða samstæðu bæjarins (A- og B- hluta) er jákvæð um 597 m.kr. sem er um 346 m.kr. umfram áætlun. Veltufé frá rekstri samstæðunnar er 14,3 %.

Rekstrarafkoma A- hluta er jákvæð um 282 m.kr og um 426 m.kr. fyrir afskriftir og fjármagnsliði og er veltufé frá rekstri 13,4 % af A-hluta. Ársreikningurinn sýnir greinilega fjárhagslegan styrk sveitarfélagsins, sem er í sterkri stöðu til að standa undir framtíðaruppbyggingu.

Fjárfestingar bæjarins hafa aukist á árinu og eru þær sem fyrr fjármagnaðar af eigin fé. Ljóst er að framtíð Vestmannaeyja getur verið björt þrátt fyrir miklar áskoranir sem geta verið frá náttúrunnar hendi eða út frá pólitískum áhrifum, segir í bókun meirihlutans.

Niðurstöðutölur

Ársreikningurinnn var samþykktur með níu samhljóða atkvæðum bæjarfulltrúa. Niðurstöðutölur úr endurskoðuðum ársreikningi Vestmannaeyjabæjar og stofnana hans fyrir árið 2024:

a) Ársreikningur sjóða í A-hluta 2024:

Afkoma fyrir fjármagnsliði ((jákvæ) kr. 173.046.000
Rekstrarafkoma ársins (jákvæð) kr. 282.155.000
Niðurstaða efnahagsreiknings kr. 15.433.051.000
Eigið fé kr. 8.831.989.000

Samstæða Vestmannaeyjabæjar

Afkoma fyrir fjármagnsliði (jákvæð) kr. 510.233.000
Rekstrarafkoma ársins (jákvæð) kr. 597.207.000
Niðurstaða efnahagsreiknings kr. 18.545.200.000
Eigið fé kr. 12.108.501.000

b) Ársreikningur Hafnarsjóðs Vestmannaeyja 2024:

Afkoma fyrir fjármagnsliði kr. 75.887.000
Rekstrarafkoma ársins kr. 111.142.000
Niðurstaða efnahagsreiknings kr. 2.732.375.000
Eigið fé kr. 2.534.863.000

c) Ársreikningur Félagslegra íbúða 2024:

Afkoma fyrir fjármagnsliði kr. 3.235.000
Rekstrarafkoma ársins kr. 0
Niðurstaða efnahagsreiknings kr. 902.398.000
Eigið fé (neikvætt) kr. -50.568.000

d) Ársreikningur Fráveitu Vestmannaeyja 2024:

Afkoma fyrir fjármagnsliði kr. 128.140.000
Rekstrarafkoma ársins kr. 108.437.000
Niðurstaða efnahagsreiknings kr. 829.176.000
Eigið fé kr. 586.329.000

e) Ársreikningur Vatnsveitu 2024:

Afkoma fyrir fjármagnsliði kr. 0
Rekstrarafkoma ársins kr. 0
Niðurstaða efnahagsreiknings kr. 449.297.000
Eigið fé kr. 0

f) Ársreikningur Vestmannaeyjaferjunar Herjólfs ohf 2024:

Afkoma fyrir fjármagnsliði kr. 94.294.000
Rekstrarafkoma ársins kr. 98.299.000
Niðurstaða efnahagsreiknings kr. 577.518.000
Eigið fé kr. 366.653.000

g) Ársreikningur Náttúrustofu Suðurlands 2024:

Afkoma fyrir fjármagnsliði kr. 10.606.000*
Rekstrarafkoma ársins kr. 10.606.000*
Niðurstaða efnahagsreiknings kr. 28.502.000
Eigið fé kr. 27.440.000

h) Ársreikningur Eyglóar eignarhaldsfélags ehf. 2024:

Afkoma fyrir fjármagnsliði kr. 15.735.000
Rekstrarafkoma ársins (neikvæð) kr. -13.432.000
Niðurstaða efnahagsreiknings kr. 756.452.000
Eigið fé (neikvæð) kr. -37.704.000

*Uppfært 14.4. Í upphaflegum tölum var sagt að niðurstaðan hafi verið neikvæð. Svo er ekki og hafa tölurnar verið uppfærðar.