Bæjarráð Vestmannaeyja fjallaði á fundi sínum í liðinni viku um stöðu samgöngumála, þar á meðal rekstur Herjólfs, flugáætlun og dýpkunarmál í Landeyjahöfn.

Áætlunarflug hefst um mánaðarmótin

Ólafur Jóhann Borgþórsson, framkvæmdastjóri Herjólfs, kynnti drög að fjárhagsáætlun félagsins fyrir árið 2026. Gert er ráð fyrir tæplega 22 milljóna króna jákvæðri rekstrarniðurstöðu á næsta ári. Á fundinum kom jafnframt fram að áætlað er að Herjólfur sigli átta ferðir á dag næsta sumar, frá 5. júní til 23. ágúst.

Flugsamgöngur milli Vestmannaeyja og Reykjavíkur hefjast svo á ný 1. desember. Samkvæmt Norlandair verður ein ferð flogin á föstudögum, sunnudögum og mánudögum og tvær ferðir á fimmtudögum. Bæjarráð segir það ánægjulegt að flugsamgöngur séu að hefjast á ný en telur þriggja mánaða samningstímabil of stutt og hefur gert athugasemdir við það við Vegagerðina.

Krefjast fullnýtingar dýpkunartækja og breyttra útboðsskilyrða

Bæjarstjóri gerði ráðinu grein fyrir nýlegum fundi með Vegagerðinni um stöðu dýpkunar í Landeyjahöfn. Þar kom fram að óásættanlegt sé að ekki sé dýpkað þegar færi gefst, enda valdi það verulegri þjónustuskerðingu þegar siglt er eftir sjávarföllum. Bæjarráð ítrekar að nýta verði hvern einasta klukkutíma sem fæst til dýpkunar og bendir á að það hafi ekki gengið nægilega vel undanfarið.

Bæjarráð leggur jafnframt áherslu á breyttar forsendur í fyrirliggjandi útboði vegna dýpkunar. Ráðið vill að fjárhagslegt vægi verði mest 60% og tæknileg geta minnst 40%, í stað þess sem nú gildir þar sem fjárhagslegt vægi er 75% en tæknilegt aðeins 25%. Ráðið skorar á ráðherra og þingmenn Suðurkjördæmis að tryggja nauðsynlegt fjármagn til að hægt sé að breyta forsendunum og auka líkur á að fleiri aðilar geti boðið í verkið.