Tilkynnt hefur verið um úthlutanir úr Lóu – nýsköpunarstyrki fyrir landsbyggðina. Í ár hljóta 27 verkefni styrk alls fyrir tæplega 139 milljónir króna. Nýsköpunarverkefnin sem hljóta styrk að þessu sinni eru jafn fjölbreytt og þau eru mörg og dreifast um landið allt.

Í tilkynningu frá háskóla-, iðnaðar- og nýsköpunarráðuneytinu segir að styrkjum úr Lóu sé ætlað að styðja við eflingu byggða og landshluta með nýskapandi verkefnum, auk þess að hlúa að vistkerfi nýsköpunar á landsbyggðinni.

Alls bárust 89 umsóknir á fjölbreyttum sviðum, frá nýskapandi verkefnum með sjálfbærni og fullnýtingu afurða að leiðarljósi til uppbyggingu innviða fyrir rannsóknir og þróun og innleiðingu nýrra aðferða og verkfæra fyrir nýsköpunarumhverfið.

Eflir atvinnulíf og verðmætasköpun

Meðal verkefna sem hljóta styrk í ár er undirbúningur og frumhönnun ölduorkugarða við Vestmannaeyjar, rannsókn á jarðgerlum og möguleiki á nýtingu þeirra, hönnun á hugbúnaði sem les námsbækur í stærðfræði á sjálfvirkan hátt, þróun á nýrri og hagkvæmri nálgun við verkun á djúpþara og smáforrit sem heldur utan um næringarinntöku með aðgengilegum hætti.

„Með nýsköpunarstyrk Lóu stuðlum við að frjórri jarðvegi fyrir nýjar hugmyndir og nýsköpun á landsbyggðinni. Verkefnin sem fá nú styrk koma af öllu landinu og eru virkilega fjölbreytt. Lóa eflir atvinnulíf og verðmætasköpun sem byggir á hugviti á forsendum landssvæðanna sjálfra. Slíkt mun leggja grunn að bjartari von og fjölbreyttari störfum fyrir þau sem vilja hafa aukið val um búsetu,“

segir Áslaug Arna Sigurbjörnsdóttir, háskóla-, iðnaðar- og nýsköpunarráðherra.

Lóa – nýsköpunarstyrkir fyrir landsbyggðina 2024 voru auglýstir 20. febrúar sl. og var umsóknarfrestur til og með 4. apríl. Matsnefnd fór yfir allar umsóknir og gerði í kjölfarið tillögur um styrkveitingu til háskóla-, iðnaðar- og nýsköpunarráðherra. Í matsnefnd Lóu árið 2024 sátu Eva Hrund Einarsdóttir, framkvæmdarstjóri MAk (Menningarfélags Akureyrar), Tryggvi Hjaltason, formaður Hugverkaráðs og Sesselja Vilhjálmsdóttir framkvæmdastjóri Tagplay, segir að endingu í tilkynningunni.

Vestmannaeyjaverkefnin

Vestmannaeyjaverkefnin eru eins og áður segir frumhönnun ölduorkugarða við Vestmannaeyjar. Það er fyrirtækið Haf-Afl sem hlýtur styrkinn sem hljóðar upp á 10.700.000 kr.

Haf-Afl hefur það að markmiði að byggja upp markvissa nýtingu ölduorku við strendur Íslands með ábyrga nýtingu auðlindarinnar, verndun náttúru og uppbyggingu atvinnulífs að leiðarljósi. Verkefnið felur í sér undirbúning allt að 100 MW ölduorkugarða við Vestmannaeyjar. Áætlaðir verkþættir eru m.a. hagkvæmnigreining, grunnhönnun fyrirhugaðra virkjanagarða, fyrstu skref að umhverfismati og byrgjagreining.

Þá hlaut Vinnslustöðin styrk upp á 12.000.000 kr. fyrir sjávarvatn og nýting hliðarstrauma.

Í umsögn segir að Vinnslustöðin hf. hafi komið sér upp vatnshreinsistöð sem framleiðir neysluvatn úr sjó. Við þá framleiðslu er salt síað frá ásamt öðrum steinefnum (blanda á pækilformi) sem mögulega er unnt að nýta. Í verkefninu stendur til að kanna nýtingarmöguleika m.t.t. matvælaöryggis, afkasta, kostnaðar og sjálfbærni.

Hægt er að sjá allar styrkveitingarnar úr sjóðnum hér.

https://eyjar.net/sjohreinsivel-tekin-i-gagnid/

https://eyjar.net/skoda-uppsetningu-olduvirkjana/