Í dag kom fram að ekki standi til hjá Vegagerðinni að segja upp samningi stofnunarinnar við Björgun um dýpkun Landeyjahafnar. Eitt ár er eftir af samningnum.

Bæjarstjórn Vestmannaeyja tók málið fyrir á fundi sínum í dag, en skýrt hefur komið fram hjá bæjaryfirvöldum að Vegagerðin grípi til aðgerða gagnvart dýpkunaraðila í Landeyjahöfn vegna vanefnda á samningi.

Mikil vonbrigði

Í sameiginlegri bókun bæjarstjórnar segir að Vestmannaeyjabær hafi ítrekað lýst yfir óánægju við Vegagerðina með dýpkunarmálin í Landeyjahöfn. Verktakafyrirtækið sem sinnir dýpkun hefur ekki uppfyllt samning um dýpkun sem skyldi og hefur bæjarráð farið fram á  það við Vegagerðina að hún grípi til aðgerða vegna vanefnda á samningi.

Vegagerðin hefur nú tilkynnt að samningi við Björgun verði ekki sagt upp en aðgerðaáætlun fyrirtækisins um bætt afköst og aðrar umbætur verður gerð að viðauka við samninginn.

Bæjarstjórn lýsir miklum vonbrigðum með að ekki hafi verið gripið til þess að rifta samningi við dýpkunaraðila og fá öflugri verktaka til verksins. Við þessa niðurstöðu verðum við að vona að dýpkunaraðilinn fylgi eftir þessum viðauka með bættum vinnubrögðum, svo siglingar til Landeyjahafnar truflist ekki vegna lélegs undirbúnings á því að taka að sér verk sem þetta.

https://eyjar.net/bjorgun-afram-treyst-fyrir-dypkun/