Ingólfur Þórarinsson, betur þekktur sem Ingó veðurguð, mun gefast tækifæri til þess að “frumflytja” Þjóðhátíðarlagið sitt í Herjólfsdal þetta árið. Þetta kom fram í tilkynningu til Eyjafrétta.
Venju samkvæmt verður Ingó þannig einn af listamönnum hátíðarinnar nú og líkt og undanfarin ár stýrir hann hinum geysivinsæla brekkusöng á sunnudagskvöldinu sem Árni Johnsen gerði ódauðlegan. En Ingó hefur haldið stemningu meðal Þjóðhátíðargesta síðan 2013.
Í ár gefst honum þó tækifæri til þess að flytja í fyrsta sinn í Herjólfsdal Þjóðhátíðarlagið sitt “Takk fyrir mig”, sem átti að vera lag hátíðarinnar 2020. En hátíðin var ekki haldin í fyrra sökum samgöngutakmarkana í kjölfar heimsfaraldursins Covid-19. Ingó verður þannig hluti af kvölddagskrá laugardagsins. Þjóðhátíðarlagið 2021 verður þó vafalaust frumflutt á sínum sínum hefðbundna tíma í föstudagsdagskránni kl. 20:30. Lagið í ár ber titilinn “Göngum í takt” og er höfundur þess Hreimur Örn Heimisson sem samið hefur nokkur lög hátíðarinnar.
Ólíkt undanförnum árum verður brekkusöngur Ingó ekki í beinni og opinni dagskrá á Bylgjunni, Stöð 2 og Vísi eins og áður. Þess í stað verður hægt að kaupa sér aðgang í gegnum myndlykla Vodafone og Símans. Sena Live mun stýra viðburðinum. Er þetta þetta sambærilegt mörgum þeim fjarviðburðum og heimatónleikum sem þjóðin kynntist á síðasta ári vegna faraldursins.
Þjóðhátíðarlagið 2020
Þjóðhátíðarlagið 2021
Í tilkynningu segir að forsalan á Þjóðhátíð í Eyjum gengur gríðarlega vel og nú hefur Þjóðhátíðarnefnd brugðist við gríðarlegri eftirspurn með því að setja ferðir með Gamla Herjólfi í sölu.
