Í dag fer fram árlegt utanvegahlaup, Puffin Run. Hlaupið byrjar kl.12:15 og er upphaf hlaupsins frá Tangagötu við mjölgeymslu Ísfélagsins. Fram kemur í tilkynningu frá lögreglunni í Vestmannaeyjum að Tangagötu verður lokað frá kl.12:00 og á meðan hlauparar leggja af stað. Einnig verður lokað fyrir umferð á Stórhöfðavegi við Klaufina. Lögreglan vill benda ökumönnum á að fara varlega um götur bæjarins og á þeim stöðum sem hlauparar verða á ferðinni. Starfsmenn hlaupsins verða á nokkrum stöðum á hlaupaleiðinni til leiðbeiningar fyrir vegfarendur og hlaupara.
Við náðum tali af Magnúsi Bragasyni einum af skipuleggendum hlaupsins núna í morgunsárið. Hann sagði að veðrið væri eftir pöntun og allt að verða klárt fyrir það að taka á móti rúmlega 1000 hlaupurum. “Þetta verður bara frábært eins og venjulega”, sagði Magnús önnum kafinn.
