Hljómsveitin Molda sem kemur fram á Eyjatónleikunum í Eldborg 27. janúar n.k. hefur gert ábreiðu og endurgert lagið “Eyjan mín í bláum sæ” eða “Heim á ný” eins og lagið er stundum kallað eftir Árna Johnsen sem féll frá 6. júní 2023.
Lagið hefur verið mikið spilað á Eyjakvöldum af sönghópnum Blítt og Létt og hefur verið ómissandi á þeim kvöldum. Molda fékk leyfi fjölskyldu Árna til að gera nýja útgáfu af laginu og gera það þannig að sínu. Árni samdi lagið 1973 þegar eldgosið stóð yfir á Heimaey og gaf út á smáskífu sama ár, því er lagið um 51 árs gamalt. Molda fékk hluta af Karlakór Vestmannaeyja til að syngja með í laginu og var upptökustjórn í höndum Gísla Stefánssonar ásamt Molda. “Útgáfan er óður okkar til Árna og allt það sem hann gerði fyrir tónlistarlífið og menninguna í Eyjum,” segir í tilkynningu frá sveitinni. Hægt er að hlusta hér að neðan.
