Besta deild kvenna hefst í dag með þremur viðureignum. Á Hásteinsvelli taka Eyjastúlkur á móti Selfossi. Flautað er til leiks klukkan 18.00 í Eyjum.

Það er nýr þjálfari í brúnni hjá ÍBV en Búlgarinn Todor Hristov tók við liðinu fyrir komandi leiktíð. Við heyrðum hljóðið í Todor í aðdraganda mótsins. „Ég er meira en spenntur fyrir sumrinu og hlakka mikið til fyrsta leiks. Það er ekkert skemmtilegra en að þjálfa á einum af fallegustu stöðum á Íslandi.“

Hann segir aðspurður liðið vera að koma vel undan vetri. „Ég er mjög lánsamur með þennan hóp. Við spiluðum leiki í Lengjubikarnum og æfingarleiki og er það mjög gaman fyrir mig sem þjálfara að sjá svona margar ungar stelpur taka þátt og sjá framfarir hjá þeim hvern einasta dag. Þetta hafa verið góðir leikir þar sem stelpurnar hafa öðlast mikilvæga reynslu.“

Eins og oft áður hafa orðið töluverðar breytingar á leikmannahópnum milli ára. „Við höfum fengið frábæra leikmenn í liðið til okkar þær Holly O’Neill og Caley Lordemann frá Bandaríkjunum. Valentina Quinones og Camila Pescatore eru báðar frá Venezuela en með ítalskt vegabréf. Svo er Kristjana Sigurz komin til okkar aftur. Þær sem eru farnar eru Sandra, Madison, Ameera, Þórhildur, Hanna, Lavinia, Jessica, Lana og Auður.“

Todor hafði þetta að segja að lokum. „Mig langar að hvetja alla að koma á leiki í sumar og búa til stemningu fyrir okkar stelpur. Mér finnst þær búnar að standa sig vel í vetur og mér finnst þær eiga það skilið. Við munum lofa að gera okkar besta í hverjum einasta leik.“