Nýtt hús rís fyrir saltfisk- og uppsjávarvinnslu VSV

Framkvæmdir eru í þann veginn að hefjast á Vinnslustöðvarreitnum við nýtt tveggja hæða steinhús á tveimur hæðum, alls um 5.600 fermetra, sem í verður saltfiskvinnsla á neðri hæð og innvigtun uppsjávarafla á efri hæð.

Nýbyggingin verður L-laga, að hluta í gamla þróarrýminu sem snýr út að Hafnargötu í krikanum þar sem er nýlegur aðalinngangur VSV.

Willum Andersen, tæknilegur rekstrarstjóri Vinnslustöðvarinnar, segir að stefnt sé að því að saltfiskvinnsla hefjist í nýja húsinu á vetrarvertíð 2025:

„Við erum núna að hreinsa út úr húsunum og byrjum að rífa þökin einhvern næstu daga. Gamlir útveggir þróarinnar verða notaðir áfram en steypt nýtt milligólf og öðru breytt eins og þurfa þykir.

Þegar þar að kemur fer mikill tækjabúnaður inn á gólf efri hæðar. Þar verður innvigtun uppsjávarafla, flokkun og flökun sem uppfyllir allar kröfur í nýrri reglugerð þar að lútandi“.

Breytt áform

Á aðalfundi VSV 2022 var greint frá ákvörðun stjórnar um að rífa gömlu húsin þar sem starfrækt er bolfiskvinnsla og verbúðin sáluga á efri hæð en reisa í staðinn átta þúsund fermetra hús í áföngum svo unnt yrði að halda þar gangandi vinnslu á framkvæmdatímanum.

Á aðalfundi VSV 2023 var síðan tilkynnt að þessum áformum yrði yrði slegið á frest „í varúðarskyni vegna alþjóðlegs óvissuástands í efnahagsmálum með tilheyrandi áhrifum á starfsemi fjármálastofnana erlendis og hérlendis.“

Áfram stendur sú ákvörðun að fresta um óákveðinn tíma að rífa bolfiskvinnsluhúsið en ný tíðindi eru hins vegar að ráðist verði í nýbyggingu þar sem loðnuþrærnar eru og saltfiskvinnslan færist þangað. Þar með verður auðveldara en ella að rífa gamla bolfiskhúsið og reisa nýtt í staðinn, hvenær svo sem að því kemur.

Verktaki, hönnun & handbolti

T.ark arkitektar í Reykjavík sjá um hönnun nýja hússins.

Eykt ehf. verður aðalverktaki. Eykt er öflugt þekkingarfyrirtæki í byggingariðnaði og hefur annast stórframkvæmdir fyrir Vinnslustöðina undanfarin ár við nýja uppsjávarhúsið, tengibygginguna, mjölhúsið og frystigeymsluna á Eiði.

Eykt annast verkefni og framkvæmdi af ýmsu tagi um allt land, hvort heldur er nýbyggingar íbúðar- og atvinnuhúsnæðis, skóla eða sjúkrahúsa, samgöngumannvirki og virkjanir. Eitt stærsta verkefni fyrirtækisins nú er nýr Landspítali í Reykjavík.

Gömlu loðnuþrærnar eru auðvitað hluti af langri sögu VSV en þær koma líka ögn við íþróttasögu Vestmannaeyja. Í bók, sem gefin var út árið 2016 í tilefni af sjötugsafmæli VSV, er haft eftir Ingibjörgu Finnbogadóttur, starfsmanni fyrirtækisins til áratuga:

„Ég æfði handbolta og keppti með Tý. Eitt sumarið var æfingarsvæðið opin hráefnisþró Fiskimjölsverksmiðjunnar og því einungis yfir götu að fara úr Vinnslustöðinni beint á æfingu. Þá styrktust upphandleggsvöðvarnir verulega og ég varð fyrir vikið býsna skothörð um þær mundir!“

Afstöðu- og útlitsteikningar frá T.ark arkitektum ehf.

Sjóveiki

Hvað er sjóveiki?

Sjóveiki er misræmi milli skynfæra líkamans sem senda boð til heilans um hreyfingu – kyrrstöðu.

Þegar einstaklingur er úti á sjó þá nema skynjarar í vökvafylltum gangi í innra eyra hreyfingu og senda boð til heilans að einstaklingur sé á hreyfingu. Augun senda hins vegar boð til heilans um að viðkomandi sé kyrr. Heilinn á erfitt með að vinna úr þessum misvísandi og ósamræmdu upplýsingum og sendir skilaboð til magans um að tæma sig – þ.e. veldur uppköstum.

Einkenni sjóveiki eru þreyta, ógleði, svimi, svitakóf og uppköst.

Góð ráð til að hindra sjóveiki:

Góð hvíld daginn fyrir brottför. Að fara seint að sofa og snemma um borð í bát fer ekki vel saman ef fólk er hætt við sjóveiki.

Forðist áfenga drykki daginn fyrir brottför

Forðist djúpsteiktan, brasaðan eða saltan mat daginn fyrir siglingu.

Borðið góðan morgunverð. Borðið gjarnan hvítt brauð, hafragraut og ávexti þó ekki sítrus ávexti.

Forðist mikið koffein. Mikið kaffi er ekki það sem maganum líkar fyrir sjóferð.

Hafðu mat með þér á sjó. Gott er að hafa samlokur með kjúklingi eða kalkún. Kjötið er fitusnautt og brauðið er róandi í maga. Hafðu endilega eitthvað til að grípa í sem er létt í maga. Bananar eru mjög góðir til að narta í ef þú finnur fyrir ógleði en einnig er gott að hafa létt kex eða annað sem er ekki salt eða fitumikið.

Drekkið vel af vatni en einnig er gott er að drekka kóla drykki eða engiferöl í sjóferðinni

Lyf við sjóveiki þ.e. lyf sem slá á einkennin og fást án lyfseðils í apóteki.

Koffínátín – fæst án lyfseðils

Postafen – fæst án lyfseðils

Scopolamin plástur – lyfseðilsskyltEinnig má fá armbönd gegn ferðaveiki sem sumir telja að hjálpi.

Önnur ráð:

Engifer er jurt sem nýlega hefur fengið aukna athygli vegna þess að því er haldið fram að hún geti slegið á ógleði sem fylgir sjóveiki. Til forna tuggðu kínverskir sjómenn engiferrót til að draga úr sjóveiki. Flest lyf sem virka á ógleði verka á heilann en engifer virkar aðeins á magann. Ráðlagt er að taka 1000 mg. hylki hálftíma fyrir brottför. Einnig má taka eitt eða tvö 500 mg. hylki sem eru til viðbótar á ferðalaginu. Ekki er ráðlagt að drekka coke með engifertöflum.

Piparminta og te eru einnig gömul húsráð við ferðaveiki.

Sumum finnst betra að taka sýrujafnandi töflur, Alminox eða slíkt áður en þú heldur á sjó og þá er gott að hafa box með út á sjó.

Hvar í skipinu er best að vera o.fl.

Minna finnst fyrir hreyfingu og veltingi ef maður er staddur næst miðju bátsins.

Mörgum finnst gott að vera í kulda, t.d.að vera úti á dekki og láta vindinn leika um sig.

Matarlykt fer illa í þá sem hætt er við sjóveiki og einnig pústið frá bátnum.

Þungun:

Þungaðar konur sem þjást af sjóveiki mega nota koffinátín í litlum skömmtum en best er að ráðfæra sig við lækni eða lyfjafræðing.
Þunguðum konum er ekki ráðlagt að nota engifer þar sem það er ekki staðfest hvort það geti haft skaðleg áhrif á fóstur.

Breytt áform

Verktaki, hönnun & handbolti

Nýjustu fréttir

Góð ráð fyrir siglingu

Sjóveiki