Í tilefni af útkomu Náttúrulögmálanna ætla ég í upplestrarferð um landið. Dagskráin er mislöng eftir aðstæðum á hverjum stað en oftast nær er þetta ríflega hálftíma bókarkynning plús myndasýning og spjall um sögusvið og upplegg – en bókin er yfirskilvitleg söguleg skáldsaga sem gerist á Ísafirði árið 1925. Á nokkrum stöðum er ég svo með makkera mér til halds og trausts. Ég ætla líka að fylla bílinn af bókum (ekki bara þessari nýju), er búinn að leigja mér posa, fylla áritunarpennann af bleki, fjárfesta í millistykkjum fyrir allra handa skjávarpa, láta prenta bókamerki (sem fylgja frítt með seldum bókum), panta tíma í dekkjaskipti fyrir bílinn, gera yfirlit yfir hvar sé best að fara í sund, pússa spariskóna og strauja skyrturnar. Nú getur ekkert stöðvað mig (ég treysti samt á að við leggjumst saman á bæn til að stöðva verstu vetrarlægðirnar).

Ég kem til Vestmannaeyja í dag og ætla að vera á bókasafninu kl. 17.
Eiríkur Örn Norðdahl