Eyjamenn virkuðu lítt sannfærandi gegn botnliði Hauka þegar liðin mættust á Hásteinsvelli í dag. Það virtist vera lítill áhugi almennt í Eyjum fyrir leiknum, aðeins 501 mætti á leikinn og leikmennirnir sjálfir virtust vera hálf áhugalausir, í það minnst í fyrri hálfleik. Eyjamenn lentu undir snemma leiks en höfðu heppnina með sér og náðu að jafna fyrir leikhlé. Það var svo allt annað að sjá til Eyjamanna í síðari hálfleik enda skoruðu þeir tvö mörk og unnu að lokum 3:2.