Í hádeginu í dag var dregið í 32 ja liða úrslitum Bikarkeppni KSÍ. Tvö lið frá Eyjum voru í pottinum, ÍBV og KFS en ÍBV kemur nú inn í keppnina ásamt úrvalsdeildarliðunum á meðan KFS er þegar búið að vinna tvo leiki í keppninni. ÍBV dróst á móti Víking frá Ólafsvík og fer leikur liðanna fram á Ólafsvík. Þess má geta að Magnús Gylfason þjálfaði og lék á sínum tíma með Víkingi og Brynjar Gauti Guðjónsson, leikmaður ÍBV, lék með Víkingum áður en hann gekk í raðir ÍBV.