Á fimmtudaginn sl. fór fram kynning og vígsla á nýjum bekkjum í lýðheilsu- og samfélagsverkefninu “Brúkum bekki”. Nýju bekkirnir eru allir staðsettir í miðbænum.

Fram kom í máli Ólafar Aðalheiðar Elíasdóttur (Ólu Heiðu) – sem farið hefur fyrir verkefninu – að fyrir rúmum tveim árum hafi Unnur Baldursdóttir bent henni á þetta verkefni.

„Hún sagði bara svona Óla getur þú ekki farið í þetta, þú ert svo góð í svona.“

Hægt að setja sér markmið um vegalengd

Verkefnið hófst árið 2010 í tilefni af 70 ára afmæli Félags sjúkraþjálfara á Íslandi. Það var ákveðið að fara af stað með samfélagsverkefni sem hvatningu til aukinnar hreyfingar, til hagsbóta fyrir almenning.

Sjúkraþjálfarar á Akureyri riðu á vaðið og vígðu fyrstu tvær leiðirnar árið 2010. Verkefnið gengur út á að hvíldarbekkjum er komið fyrir með 200 -250 m millibili á eins kílómetra  merktri gönguleið.

Gönguleiðirnar eru t.d. nálægt íbúabyggð eldra fólks og félagsmiðstöðvum heldri borgara.
Verkefnið er hugsað fyrir þá sem eru orðnir slakir til gangs og eða þurfa að ná sér eftir aðgerðir og auðvitað alla aðra, t.d. gott að vita hversu löng gönguleiðin er og hægt að setja sér markmið um vegalengd.

Verkefnið í gangi víðar á landinu

Verkefnið er nú þegar á Akureyri, Húsavík, Höfn, Hveragerði, Hafnarfirði, Kópavogi, Garðabæ og Mosfellsbæ oftast framkvæmt í samvinnu við Félag eldri borgara og sveitarfélagið.

Þá kom fram í máli Ólu Heiðu að Anna Hulda Ingadóttir sjúkraþjálfari hafi ásamt Ólu fundað með formanni Félags sjúkraþjálfara um verkefnið og þar létu þær vita að þær hefðu áhuga á að koma verkefninu í gang hér í Eyjum. Formaðurinn fagnaði áhuga Ólu og Önnu á þessu verkefni. En þess má geta að félagið styrkti merkingar á bekkjunum.

Því næst var funduðað með fulltrúum Vestmannaeyjabæjar. Þar var ákveðið að fara í verkefnið og byrja á að fá fólk til aðstoðar. Dagný Hauksdóttir, Thelma Rós Tómasdóttir, Inga Fía og Linda Rós Sigurðardóttir hafa allar komið að verkefninu. Anna Hulda sjúkraþjálfari sá um að fá merkingar á bekkina.

Þrjár fjölskyldur gáfu bekki

„Við kortlögðum 4- 5 gönguleiðir, gengum leiðirnar og fórum yfir hvar ætii að staðsetja bekkina. Ákveðið var að setja í gang tvær leiðir. Fyrsta leiðin var við Hraunbúðir og svo þessi leið í miðbænum. Það þurfti 8 bekki á þessa leið. Fulltrúar frá Kvenfélaginu Heimaey komu síðasta sumar og færðu bænum 5 bekki. Fjórir þeirra eru staðsettir Hraunbúðaleiðinni og einn hér í miðbænum. Þá vantaði þrjá bekki hér á þessa leið. Þrjár fjölskyldur ákváðu þá að styrkja verkefnið og gefa bekkina.

Bekkina gáfu Kristmann Karlsson, Kristín og fjölskylda. Fjölskylda Elíasar Björnssonar til minningar um hann og Magnús Bragason, Adda og fjölskylda. Þökkum við þeim kærlega fyrir þetta rausnalega framlag.“

sagði Óla Heiða í ræðu sinni. Þá sagði hún að Linda Rós hafi útbúið kort gönguleiðunum og merkt bekki inn á kortin. Kortunum verður komið fyrir í Íþróttamiðstöðinni, í félagsmiðstöð eldri borgara, á heimasíðu Vestmannaeyjabæjar, á sjúkraþjálfarastofum og á heilsugæslu HSU.

„Nú afhendum við Vestmannaeyjabæ og bæjarsamfélaginu þessa bekki með ósk um að öll umsýsla og umhirða á bekkjum verði í höndum sveitarfélagsins.“

Eftir ræðu Ólafar var gengið af stað og endað niður á bryggju þar sem boðið var upp á veitingar við einn af bekkjunum. Myndasyrpu frá bekkjarröltinu má sjá hér að neðan. Þar fyrir neðan má svo sjá kort af gönguleiðinni.

https://eyjar.net/fyrsta-gonguleidin-vigd/