38% aukning á milli ára
adgerd_DSC_3053_opf
Veruleg aukning er á útflutningsverðmæti ferskra afurða og svo saltaðra og þurrkaðra afurða. Eyjar.net/Óskar Pétur Friðriksson

Útflutningsverðmæti sjávarafurða nam 28,5 milljörðum króna í apríl samkvæmt fyrstu bráðabirgðatölum um vöruskipti í mánuðinum, sem Hagstofan birti í gærmorgun. Það er rétt rúmlega 2% aukning í krónum talið miðað við apríl í fyrra. Þar sem gengi krónunnar var tæplega 1% hærra nú í apríl en í sama mánuði í fyrra, er aukningin mæld í erlendri mynt á svipuðu róli, eða rúmlega 1%. Frá þessu er greint í Radarnum – mælaborði sjávarútvegsins.

Útflutningsverðmæti ferskra afurða nam 7,7 milljörðum króna í apríl og jókst um tæp 38% á milli ára á föstu gengi

Eins og alla jafna er þróunin nokkuð mismunandi á milli einstaka afurðaflokka. Veruleg aukning er á útflutningsverðmæti ferskra afurða og svo saltaðra og þurrkaðra afurða.

Þannig nam útflutningsverðmæti ferskra afurða 7,7 milljörðum króna í apríl og jókst um tæp 38% á milli ára á föstu gengi. Ferskar afurðir voru þar með um 27% af útflutningsverðmæti sjávarafurða í heild í mánuðinum, en það hlutfall hefur aldrei verið svo hátt í apríl. Útflutningsverðmæti saltaðra og þurrkaðra afurða nam 5,1 milljarði króna í apríl og jókst um 27% á milli ára á sama kvarða. Þá var rúmlega 5% aukning í útflutningsverðmæti „annarra sjávarafurða“, en þar undir teljast meðal annars loðnuhrogn. Þar sem um fyrstu bráðabirgðatölur Hagstofunnar ræðir í apríl liggja ekki fyrir upplýsingar um verðmæti niður á einstaka fisktegundir í mánuðinum. Gera má þó ráð fyrir að nokkur útflutningur sé á loðnuhrognum í apríl frá síðustu loðnuvertíð, líkt og verið hefur undanfarna mánuði.

Útflutningsverðmæti allra annarra afurðaflokka dróst saman á milli ára í apríl. Útflutningsverðmæti heilfrysts fisks dróst saman um 35% á milli ára á föstu gengi. Þann samdrátt má vafalaust að stærstum hluta rekja til loðnubrests, enda var þó nokkur útflutningur á heilfrystri loðnu í apríl í fyrra. Af öðrum afurðaflokkum má nefna að nokkur samdráttur var í útflutningsverðmæti frystra flaka (-11%), fiskimjöls (-8%) og lýsis (-10%). Mestur var þó samdrátturinn í útflutningsverðmæti rækju, en hann nam um 61% á föstu gengi.

r_1

Lítilsháttar samdráttur á fyrsta ársþriðjungi

Á fyrstu fjórum mánuðum ársins er útflutningsverðmæti sjávarafurða komið í tæpa 111 milljarða króna. Það er rétt rúmlega 3% samdráttur miðað við sama tímabil í fyrra á föstu gengi. Vart þarf nefna að þennan samdrátt má alfarið skrifa á loðnubrest. Það endurspeglast ágætlega í þeim mikla samdrætti sem er í útflutningsverðmæti fiskimjöls (40%) og heilfrysts fisks (33%) á milli ára, en í báðum flokkum voru loðnuafurðir, þ.e. loðnumjöl og heilfryst loðna,  fyrirferðarmiklar í fyrra.

Af öðrum afurðaflokkum má nefna að dágóð aukning er í útflutningsverðmæti lýsis (16%) og ferskra afurða (14%) á fyrstu fjórum mánuðum ársins miðað við sama tímabil í fyrra. Í þeim tilvikum hafa verðmætin í raun aldrei verið meiri á fyrsta ársþriðjungi og nú í ár. Minni breyting var á útflutningsverðmæti annarra afurðaflokka á milli ára, eins og sést á myndinni hér fyrir neðan.

Nýjustu fréttir

Áhugavert
Mugison, saft í brúsa og pönsur á Skansinum
Áhugavert
Grjóthrun við Friðarhöfn
Bæjarmálin
Lægsta tilboð í svið á Vigtartorgi 10,6 milljónum yfir áætlun
Aðsend grein
Upplýsingaóreiða formanns utanríkismálanefndar
Áhugavert
Rauðáta gæti orðið ný atvinnugrein
Fréttir
Lögreglan minnir á mikilvægi umferðaröryggis á Orkumótinu
Fréttir
Fiskibátur vélarvana við Vestmannaeyjar
Íþróttir
Orkumótið hefst á morgun
Mest lesið

Góð ráð fyrir siglingu

Sjóveiki

Hvað er sjóveiki?

Sjóveiki er misræmi milli skynfæra líkamans sem senda boð til heilans um hreyfingu – kyrrstöðu.

Þegar einstaklingur er úti á sjó þá nema skynjarar í vökvafylltum gangi í innra eyra hreyfingu og senda boð til heilans að einstaklingur sé á hreyfingu. Augun senda hins vegar boð til heilans um að viðkomandi sé kyrr. Heilinn á erfitt með að vinna úr þessum misvísandi og ósamræmdu upplýsingum og sendir skilaboð til magans um að tæma sig – þ.e. veldur uppköstum.

Einkenni sjóveiki eru þreyta, ógleði, svimi, svitakóf og uppköst.

Góð ráð til að hindra sjóveiki:

  • Góð hvíld daginn fyrir brottför. Að fara seint að sofa og snemma um borð í bát fer ekki vel saman ef fólk er hætt við sjóveiki.
  • Forðist áfenga drykki daginn fyrir brottför
  • Forðist djúpsteiktan, brasaðan eða saltan mat daginn fyrir siglingu.
  • Borðið góðan morgunverð. Borðið gjarnan hvítt brauð, hafragraut og ávexti þó ekki sítrus ávexti.
  • Forðist mikið koffein. Mikið kaffi er ekki það sem maganum líkar fyrir sjóferð.
  • Hafðu mat með þér á sjó. Gott er að hafa samlokur með kjúklingi eða kalkún. Kjötið er fitusnautt og brauðið er róandi í maga. Hafðu endilega eitthvað til að grípa í sem er létt í maga. Bananar eru mjög góðir til að narta í ef þú finnur fyrir ógleði en einnig er gott að hafa létt kex eða annað sem er ekki salt eða fitumikið.
  • Drekkið vel af vatni en einnig er gott er að drekka kóla drykki eða engiferöl í sjóferðinni

Lyf við sjóveiki þ.e. lyf sem slá á einkennin og fást án lyfseðils í apóteki.

  • Koffínátín – fæst án lyfseðils
  • Postafen – fæst án lyfseðils
  • Scopolamin plástur – lyfseðilsskyltEinnig má fá armbönd gegn ferðaveiki sem sumir telja að hjálpi.

Önnur ráð:

  • Engifer er jurt sem nýlega hefur fengið aukna athygli vegna þess að því er haldið fram að hún geti slegið á ógleði sem fylgir sjóveiki. Til forna tuggðu kínverskir sjómenn engiferrót til að draga úr sjóveiki. Flest lyf sem virka á ógleði verka á heilann en engifer virkar aðeins á magann. Ráðlagt er að taka 1000 mg. hylki hálftíma fyrir brottför. Einnig má taka eitt eða tvö 500 mg. hylki sem eru til viðbótar á ferðalaginu. Ekki er ráðlagt að drekka coke með engifertöflum.
  • Piparminta og te eru einnig gömul húsráð við ferðaveiki.
  • Sumum finnst betra að taka sýrujafnandi töflur, Alminox eða slíkt áður en þú heldur á sjó og þá er gott að hafa box með út á sjó.

Hvar í skipinu er best að vera o.fl.

  • Minna finnst fyrir hreyfingu og veltingi ef maður er staddur næst miðju bátsins.
  • Mörgum finnst gott að vera í kulda, t.d.að vera úti á dekki og láta vindinn leika um sig.
  • Matarlykt fer illa í þá sem hætt er við sjóveiki og einnig pústið frá bátnum.

Þungun:

Þungaðar konur sem þjást af sjóveiki mega nota koffinátín í litlum skömmtum en best er að ráðfæra sig við lækni eða lyfjafræðing.
Þunguðum konum er ekki ráðlagt að nota engifer þar sem það er ekki staðfest hvort það geti haft skaðleg áhrif á fóstur.

Eyjafréttir
Keyrt af  GDPR Cookie Compliance
Friðhelgisyfirlýsing

Þessi vefsíða notar fótspor til að við getum veitt þér bestu notendaupplifun. Upplýsingar um fótspor eru geymdar í vafranum þínum og framkvæma aðgerðir eins og að þekkja þig þegar þú kemur aftur á vefsíðu okkar og hjálpa teymi okkar að skilja hvaða hluta vefsíðunnar þér finnst áhugaverðast og gagnlegast.