Vöruhúsið opnaði dyr sínar í dag, laugardaginn 11.maí. Vöruhúsið er fjölskyldurekinn veitingastaður í Vestmannaeyjum, nánar tiltekið á Skólavegi 1.

Eyjar.net ræddi við Anton Örn Eggertsson, einn af eigendum staðarins, en auk hans eiga þau Róbert Agnarsson, Hildur Rún Róbertsdóttir og Sigrún Ósk Ómarsdóttir staðinn.

„Matseðillinn er fjölbreyttur og ættu flestir að geta fundið sér rétt sem þeim lýst vel á, bæði börn og fullorðnir. Við viljum sérstaklega taka fram að við erum með lítið barnahorn fyrir krakkana sem verður vonandi til þess að börnunum líði sem best hjá okkur. Markmiðið er að veita persónulega þjónustu við viðskiptavini og skapa notalegt andrúmsloft.“

Nóg eftir og við verðum aldrei búin

Aðspurður um hvernig það sé að sjá fyrir endann á framkvæmdum og sjá staðinn opna segir Anton að það sé einstaklega skemmtilegt.

„Þó má ekki gleyma að það er nóg eftir og við verðum aldrei búin, enda vinna að viðhalda gæðum og snyrtileika staðarins. Robbi tengdapabbi er algjör þúsundþjalasmiður svo við erum mjög heppin að hafa hann með okkur í þessu.“

Spurður út í opnunartímann segir Anton að staðurinn verði opinn frá kl. 11-21:30. Svo seinna meir langar okkur að hafa barinn opinn lengur með skemmtilegri kokteil stemningu. Vonum að viðskiptavinir taki vel í það þegar þar að kemur.

Einhver sagði mér að til standi að vera með pall sunnan megin við staðinn – stemmir það?

Það á allt eftir að koma í ljós en við vonumst til að geta þróað staðinn okkar með tímanum í takt við þarfir viðskiptavina.

Heppin með fólkið í kringum okkur

Að endingu vilja eigendurnir koma á framfæri hjartans þökkum til allra þeirra sem hafa aðstoðað þau á eitthvern hátt.

„Það þarf aðkomu margra aðila til að opna veitingastað og erum við ekkert smá heppin með fólkið í kringum okkur. Við tökum vel á móti öllum sem vilja gefa okkur tækifæri og vonumst til að fólki líði vel hjá okkur. Að lokum viljum við koma á framfæri að starfshópurinn er að læra inn á staðinn og hvert annað en taka á móti öllum með hlýju viðmóti og spennt að þjóna viðskiptavinum okkar. Sjáumst í Vöruhúsinu!“

Tæplega aldargamalt hús

Húsið Vöruhúsið við Skólaveg 1 var byggt fyrir Einar Ríka árið 1926. Þegar geymsluhúsið Marland var ennþá uppi var hægt að ganga í kjallara Vöruhússins í þar til gerðum göngum. Lengst af var verslað með matvöru í Vöruhúsinu; Bæjarbúðin, Verslun Guðjóns Scheving og Eyjakjör voru slíkar verslanir en einnig var raftækjaverslunin Kjarni þar til húsa. Einnig var Bókabúðin Helgafell þarna til húsa auk Ragga rakara, ljósmyndastofu og Athafnaverinu. Verbúðir voru líka í húsinu í fyrri tíð, segir í umfjöllun á vefnum Heimaslóð. Í seinni tíð hafa nokkrir veitingastaðir verið í húsinu auk fataverslana. Lengst af var þar staður undir nafninu Café Maria.

Óskar Pétur Friðriksson, ljósmyndari Eyjar.net leit við í Vöruhúsinu í gær þegar verið var að taka lokarennslið fyrir formlega opnun.