Margar skemmtilegar hefðir hafa skapast í kringum Þjóðhátíð í Eyjum. Ein af þeim er útgáfa Þroskaheftis, þjóðhátíðarheftis Bræðrafélagsins VKB. Er þetta tólfta árið sem heftið er gefið út.

Blaðinu var dreift í gær í öll hús í Vestmannaeyjum og er jafnframt aðgengilegt á vefnum á stafrænu formi. Blaðið er bráðskemmtilegt en ber þó að lesa með réttu hugarfari.
„Þroskahefti er á engan hátt ætlað sem lesefni undir öðrum en broslegum kringumstæðum. Þungbúinn lestur heftisins er með öllu óheimilaður og afsalar Bræðrafélagið VKB sér allri ábyrgð af slíkum lestri. Lestur heftisins er alfarið á ábyrgð lesandans. Heyranlegur lestur heftisins er mjög varasamur, varúð skal höfð í nærveru sálar. Heyrandi lesturs heftisins, svo og lesandinn sjálfur, kunna að hljóta alvarlega áverka, svo sem bros á vör eða kitl hláturtauga, séu sá eða sú ekki undir slíkt búið. Bræðrafélagið
Vinir Ketils Bónda leggur alla ábyrgð í hendur lesanda heftisins. Hafið því varan á,” segir í upphafi ritsins.

Í dag sendi svo ritstjórn Þroskaheftis frá sér tlikynningu um innköllun á heftinu.
„Því miður þá neyðumst við til þess að innkalla 2019 áganginn af heftinu. Pólitíks rétthugsun gleymdist í framleiðsluferlinu.
  Við viljum biðja alla sem vilja losa sig við gölluð eintök að stafla þeim upp fyrir framan viftuna í Herjólfsdal. Þar geta þau allavega gert eitthvað gagn og skyggt á þennan óskapnað.” segir í tilkynningunni á Facebooksíðu Þorskaheftis