Í lok júlí kom fram í fundargerð bæjarráðs Vestmannaeyja að Míla hafi óskað eftir viðræðum við Vestmannaeyjabæ um kaup á ljósleiðarakerfi Eyglóar. Þar sagði jafnframt að stjórn Eyglóar hafi fundað með Mílu og rætt kaupin auk þess sem stjórn Eyglóar hefur farið yfir hugmyndir um sölu með bæjarráði á vinnufundi.
Í niðurstöðu bæjarráðs fól ráðið stjórn félagsins að halda áfram með viðræðurnar um söluna og taka tillit til þeirra ábendinga og atriða sem komu fram á fundi ráðsins. Náist samkomulag um sölu verði samningur þar um lagður fyrir bæjarstjórn til afgreiðslu.
Samkvæmt fréttum sem sagðar voru á sínum tíma reyndi bæjarstjórn hér áður að fá Mílu (og Tölvun) til þess að leggja ljósleiðara í Vestmannaeyjum, eitthvað sem á endanum var gert af bæjaryfirvöldum undir félagi sem fékk nafnið “Eygló”. Samkvæmt heimildum Eyjafrétta/Eyjar.net hafa aðrir rekstraraðilar gagnaveitna ekki tekið þátt í söluferlinu, þrátt fyrir óskir þar um.
