„Eyjaskinna er skinnbók sem gerð var fyrir norðan fyrir Þorstein Víglundsson og er gestabók sem dregin er fram við hátíðleg tækifæri. Fyrsta færslan er frá 1938. Bjarni Guðjónsson, bróðir Ásmundar greifa skar út forsíðuna sem er hið mesta listarverk,“ segir Kári Bjarnason forstöðumaður Safnahúss um hina merkilegu bók sem liggur frammi þegar Fágætissafnið verður opnað á morgun.

„Bókin Eyjaskinna var gerð 1938 að undirlagi Þorsteins Víglundssonar. Hann mun hafa fengið norðanmenn að verka skinnin. Skólabróðir Þorsteins og nafni Davíðsson sem var framkvæmdastjóri Skinnaverksmiðjunnar á Akureyri valdi skinnin í bókina en þau eru sennilega 60 til 70 talsins en Bjarni Guðjónsson, listamaður skar út spjöldin,“ segir í grein eftir Helga Bernódusson í tímaritinu Eyjaskinnu sem nefnt er eftir Eyjaskinnu hinni stóru.

„Við höfum notað bókina mjög sparlega frá 1938, síðast 2012 þegar Bókasafn Vestmannaeyja átti 150 ára afmæli og Byggðasafnið 80 ára afmæli sem tengist Þorsteini sem hafði veg og vanda að stofnun safnsins. Núna þegar Fágætissafnið rís opnum við bókina og notum,“ segir Kári en bókin er eins og ný því skinnin hafa varðveist vel og eru fjórar síður eftir.

Sigurfinnur Sigurfinnsson, listmálari og listaskrifari var fenginn til að skrifa haus í tilefni opnunar Fágætissafnsins. Þar skrifa gestir við opnun safnsins á sunnudaginn nöfn sín á flauelsmjúkt kálfskinnið.