Jólin koma. Yfirgnæfandi líkur eru á að það gerist árlega. Jólakaffi Vinnslustöðvarinnar er að sama skapi fastur viðburður í aðdraganda hátíða í Vestmannaeyjum. Fjölmennt var í Höllinni af þessu tilefni annan sunnudag í aðventu, mikil stemning og hlaðin borð veislufanga í umsjón Starfsmannafélags Vinnslustöðvarinnar.

Jólasveinn leit að sjálfsögðu inn galvaskur og dreifði nammi á báða bóga til ungviðisins. Ókennisklæddir jólasveinar afhentu hins vegar starfsmönnum jólagjafir frá VSV , margnota brúsa sem halda heitu eða köldu og gjafabréf frá Íslandsbanka að verðmæti 12.500 krónur.

Starfsmenn á tímamótum voru að vanda heiðraðir, annars vegar í tilefni stórafmæla og hins vegar þeir sem luku störfum á árinu og voru leystir út með gjöfum í þakklætisskyni og með árnaðaróskum.

• Andrea Elín Atladóttir varð fimmtug 3. september.
• Baldur Þór Bragason varð sextugur 22. maí.
• Elsbieta Chachulav varð sextug 22. ágúst.
• Jóhann Brandur Georgsson varð sextugur 30. október.
• Kristján L. Möller varð sextugur 8. júlí.
• Sigurður Óskar Sveinsson varð sextugur 13. júní.

• Edward Switalski lauk störfum eftir 8 ár í VSV.
• Sverrir Gunnlaugsson lauk störfum eftir 31 í VSV.

Á daginn kom í jólakaffinu að Jóhann Brandur var ekki á stórafmælalistanum en átti átti þar svo sannarlega heima. Hann er beðinn velvirðingar á því. Það sem verra er að hann heldur ekki á listanum fyrir tíu árum í tilefni af fimmtugsafmæli sínu. Karlinn heldur sér svo vel að í upplýsingakerfi  VSV er hann alltaf skráður 25 ára og ekki degi eldri.