Nökkvi Sveinsson, flugmaður, fyrrverandi knattspyrnumaður með ÍBV og Eyjapeyji haslar sér nú völl ásamt félögum sínum í viðskiptalífinu. Með honum í hópi eru Óskar Bragi Sigþórsson, flugmaður, og Þorvaldur Ingimundarson, atvinnumaður í líkamsrækt. Þremenningarnir hafa keypt hina þjóðþekktu verslun RB Rúm að Dalshrauni 8 í Hafnarfirði. Fyrirtækið var stofnað árið 1943 og starfa þar átta manns.

Nýju eigendurnir hyggjast halda áfram á sömu braut og fyrri eigendur, með áherslu á góða þjónustu og fagmennsku. RB Rúm þjónustar stóran hóp viðskiptavina og framleiðir vörur eftir pöntunum – rúm, gafla og dýnur í öllum stærðum og útfærslum, eftir óskum hvers viðskiptavinar. Reynslumikið starfsfólk heldur áfram hjá fyrirtækinu, og leggja Nökkvi og félagar áherslu á vandaða einstaklings- og fyrirtækjaþjónustu, byggða á traustum grunni og sterkum tengslum við viðskiptavini. Þeir eru jafnframt að kynna sig fyrir nýjum viðskiptavinum og bjóða þá velkomna í Dalshraunið til að skoða fjölbreytt úrval fyrirtækisins.

Fleiri verkefni á teikniborðinu

Auk reksturs RB Rúma eru félagarnir með í undirbúningi að opna nýstárlega bílaþvottastöð og þjónustu fyrir bíleigendur. Húsnæði fyrirtækisins býður upp á verulegar stækkunarmöguleika á stórri og vel staðsettri lóð, og framkvæmdir vegna þeirrar byggingar og opnunar stöðvarinnar hefjast á næstu dögum. Það er sérstakur draumur Nökkva að gömlu félagar hans og vinir, Eyjamenn nær og fjær, líti við í versluninni, hitti á kappann og taki snúning í glæsilegri búðinni.

Til upprifjunar fyrir Eyjamenn þá er Nökkvi sonur Þóru Guðjóns og Svenna Valgeirs. Hann ólst upp í austurbænum í Eyjum og átti öflugan feril sem knattspyrnumaður. Hann lék alla yngri flokka með ÍBV, spilaði með meistaraflokki og átti farsælan feril með yngri landsliðum Íslands. Nökkvi flaug um tíma hjá Ingu og Val Andersen, áður en hann hóf störf hjá Flugfélagi Íslands og síðar Icelandair, þar sem hann starfar í dag.