„Þetta kom mér í opna skjöldu. Það skortir upplýsingar um forsendur samkomulagsins, af hverju Ísland gaf eftir aflahlutdeild, af hverju fallist var á löndunarskyldu í Noregi, áhrifamat niðurstöðu samkomulags fyrir Ísland og hver eru næstu skref varðandi aðra samningsaðila sem vantar inn í samkomulagið,“ segir Halla Hrund Logadóttir, þingmaður Framsóknar í Suðurkjördæmi um nýgerðan samnings utanríkisráðherra við Bretland, Færeyjar og Noreg um makrílveiðar á næsta ári.

„Því hef ég í tvígang kallað eftir því í þingsal að ráðherra komi strax fyrir atvinnuveganefnd þar sem fundir við utanríkismálanefnd eru bundnir trúnaði og ekki hægt að veita upplýsingum þaðan.

Samningar um deilistofna eru mikilvægir fyrir Ísland til að tryggja rétt Íslands og sjálfbærni veiða. Mikið er hins vegar undir að vel takist til í samningum því þeir hafa áhrif á atvinnulíf og byggðir, líkt og Eyjamenn þekkja best og þjóðarbúið í heild. Sjávarútvegur er sífellt að fjárfesta í öflugum tækjum, búnaði og fólki og því kemur lækkun sér illa fyrir greinina.“

Halla Hrund sagði öfluga hagsmunagæslu á alþjóðavettvangi á sviði sjávarauðlindarinnar vera grundvallarmál. „Að henni er nauðsynlegt að okkar allra besta fagfólk úr stjórnsýslu, háskólum og atvinnulífi komi að. Því er eðlilegt að ráðherra svari gagnrýni atvinnulífs um samráðsleysi og að samningurinn fái eðlilega og gegnsæja umfjöllun á þingi eftir að upplýsingar liggja fyrir,“ segir Halla Hrund.