Hinrik Hugi Heiðarsson hefur framlengt samning sinn við ÍBV og mun leika með félaginu út tímabilið 2027/28. ÍBV greindi frá á samfélagsmiðlum sínum fyrr í dag. 

Í tilkynningu ÍBV segir ,,Hinrik Hugi er öflugur línumaður sem leggur sig allan fram í hvert einasta skipti sem hann stígur inn á völlinn. Með baráttuanda, krafti og vinnusemi er hann mikilvægur hlekkur í liðinu og lykilmaður í framtíðarsýn félagsins. Framtíðin er björt – og Hinrik Hugi er klár í næsta kafla”.  

Hinrik Hugi er 22 ára línumaður. Hann var á láni hjá Haukum á síðasta tímabili en gekk aftur í raðir ÍBV fyrir þetta tímabil. Hinrik Hugi meiddist í leik með HBH, venslaliði ÍBV, í Grill66-deildinni fyrr í vetur og hefur ekkert leikið síðan.

Hann hefur leikið fyrir yngri landslið Íslands og var meðal annars hluti af u-20 ára landsliðinu sem lenti í 7. sæti á Evrópumótinu árið 2024.