Kostnaður við almannavarnarlögnina NSL-4 í Vestmannaeyjum hefur hækkað verulega og er nú áætlaður um 3 milljarðar króna, nær tvöfalt meira en upphaflegar áætlanir gerðu ráð fyrir.

Málið var tekið fyrir á fundi bæjarráðs í gær þar sem farið var yfir drög að erindi til innviðaráðuneytisins. Heiðar Ásberg Atlason lögmaður kynnti stöðu verkefnisins.

Í viljayfirlýsingu frá 2023 var gert ráð fyrir að framkvæmdin myndi kosta um 1,6 milljarða króna. Þar var miðað við að ríkið legði til helming kostnaðar, eða 800 milljónir króna. Ljóst er að það framlag dugar skammt miðað við nýtt kostnaðarmat, en hækkunin er rakin til utanaðkomandi þátta, hækkunar aðfanga og alþjóðlegrar stöðu.

Kalla eftir auknu framlagi ríkisins

Í bókun bæjarráðs kemur fram að sveitarfélagið geti ekki staðið undir framkvæmdinni eitt og sér. Vestmannaeyjabær rekur þegar vatnslögnina NSL-3 og tekjur af henni standa einungis undir rekstri hennar. Þá er bent á að það sé ekki hlutverk sveitarfélags að tryggja almannavarnir né reka tvær vatnslagnir.

Vatnshópur sveitarfélagsins fór yfir drög að erindinu á fundi 24. mars. Bæjarráð samþykkti að senda erindið til innviðaráðuneytisins með þeim viðbótum sem ræddar voru á fundinum, þar sem lögð er áhersla á breyttar forsendur og þörf fyrir aukna aðkomu ríkisins.