Bilun í rafmótor Herjólfs heldur áfram að hafa áhrif á siglingar skipsins og var ákveðið að fella niður ferðir dagsins til Landeyjahafnar vegna aðstæðna. Herjólfur siglir þess í stað eina ferð til Þorlákshafnar klukkan 16 í dag.

Í tilkynningu frá Herjólfi ohf. kemur fram að skipið sigli nú aðeins á annarri skrúfunni sem hafi í för með sér að það sigli hægar en venjulega auk þess sem vindur hafi meiri áhrif á skipið en ella. Vindstyrkur í Landeyjahöfn í dag hafi því gert það að verkum að ekki þótti öruggt að sigla þangað.

Fram kemur að ákvarðanir sem þessar séu ávallt teknar með öryggi skips, farþega og áhafnar að leiðarljósi.

Til að bregðast við stöðunni mun Teistan sigla eina ferð til Landeyjahafnar í dag, föstudaginn 15. maí. Brottför frá Vestmannaeyjum verður klukkan 17 og frá Landeyjahöfn klukkan 18:15.

Miðar eru seldir í gegnum vef Rib Safari og segir jafnframt í tilkynningu að þeir farþegar sem eigi nú þegar miða með Herjólfi en kjósi að fara með Teistunni fái farmiða sína endurgreidda hjá Herjólfi.