Framkvæmdir við rannsóknarboranir vegna Eyjaganga hafa mætt ýmsum áskorunum síðustu vikur. Borun hefur reynst erfið á köflum og segir Haraldur Pálsson, framkvæmdastjóri Eyjaganga, að samgönguerfiðleikar milli lands og Eyja séu einnig farnir að hafa veruleg áhrif á framvindu verkefnisins.

Borunin er nú komin niður á 66,3 metra í þeirri holu sem nú er unnið í. Áður höfðu menn náð niður á 84 metra áður en bakslag varð og hefja þurfti vinnu að nýju.

Þegar Eyjafréttir náðu tali af Haraldi var hann á leið á fund fjárlaganefndar Alþingis ásamt Ingunni Jónsdóttur, stjórnarmanni í Eyjagöngum. Til umræðu er fyrirhuguð stofnun innviðafélags ríkisins og munu forsvarsmenn Eyjaganga koma sínum sjónarmiðum á framfæri.

Kostar bæði tíma og peninga

Haraldur segir að framkvæmdirnar séu þess eðlis að stundum þurfi að steypa í holur á milli verkþátta og bíða eftir að efnið nái réttum eiginleikum áður en hægt sé að halda áfram.

„Þetta eru mjög nákvæm verk. Þegar búið er að steypa þarf að bíða eftir að steypan nái ákveðnum eiginleikum áður en næsta skref er tekið. Á meðan er oft skipt um mannskap,“ segir Haraldur.

Í einu slíku tilviki hafi samgönguvandamál hins vegar sett strik í reikninginn. „Það varð seinkun á Herjólfi og nýr hópur starfsmanna komst ekki yfir á réttum tíma. Það hefur auðvitað áhrif þegar maður er með verkefni þar sem tímasetningar skipta miklu máli.“

Hann segir að slíkir hnökrar geti fljótt orðið kostnaðarsamir. „Þetta kostar bæði tíma og fjármuni. Þegar verkefni af þessari stærðargráðu fara úr takti hefur það áhrif á bæði framvindu og kostnað.“

Þrátt fyrir áskoranir segir Haraldur að verkefnið haldi áfram af fullum krafti og að menn séu vanir því að mæta óvæntum hindrunum í framkvæmdum sem þessum.