Nýkjörin bæjarstjórn Vestmannaeyja samþykkti samhljóða á fyrsta fundi sínum bókun þar sem ríkisstjórn Íslands er skoruð á að grípa til aðgerða til að tryggja ásættanlegar samgöngur til og frá Vestmannaeyjum.

Bókunin kemur í kjölfar opins fundar Vegagerðarinnar og Vestmannaeyjabæjar sem haldinn var í Höllinni 2. júní þar sem farið var yfir stöðu Landeyjahafnar, dýpkunarmál og framtíðarskipulag samgangna. Á fundinn mættu á milli 400 og 500 manns.

Í bókuninni segir að óásættanleg staða hafi skapast í samgöngum við Vestmannaeyjar í vetur og vor þegar dýpkun Landeyjahafnar gekk illa samhliða bilun í Herjólfi IV. Afleiðingarnar hafi verið verulegt óhagræði fyrir íbúa og atvinnulíf auk neikvæðra áhrifa á ferðaþjónustu.

Kalla eftir dýpkun, flugi og varaskipi

Bæjarstjórn telur mikilvægt að gripið verði til tafarlausra aðgerða fyrir næsta vetur.

Meðal þess sem kallað er eftir er:

• Að tryggt verði aukið fjármagn til viðbótardýpkunar Landeyjahafnar.
• Að ríkisstyrkt flug til Vestmannaeyja verði aukið með fleiri sætum og tíðari ferðum.
• Að til staðar verði haffært varaskip sem geti tekið við siglingum með stuttum fyrirvara þegar á þarf að halda.

Vill hraða varanlegri lausn

Til lengri tíma lítur bæjarstjórn svo á að flýta þurfi rannsóknum, umhverfismati og framkvæmdum sem miða að því að bæta nýtingu Landeyjahafnar.

Jafnframt er skorað á stjórnvöld að hefja undirbúning að smíði nýs systurskips við Herjólf IV, enda sé ferjufloti landsins orðinn aldraður og mikil þörf á endurnýjun.

Bókunin var undirrituð af öllum níu bæjarfulltrúum Vestmannaeyja, fulltrúum Sjálfstæðisflokks, Miðflokks og Eyjalista.