Óveður gekk yfir Vestmannaeyjar í morgun með miklum vindi og úrkomu. Óskar Pétur Friðriksson, ljósmyndari Eyjafrétta, var á ferðinni og fangaði stemninguna í bænum í veðrinu.

Vindur jókst hratt í nótt og undir morgun og mældust vindhviður á Stórhöfða allt að 51 metri á sekúndu. Appelsínugul viðvörun var í gildi fyrir Suðurland vegna veðursins.

Björgunarfélag Vestmannaeyja var kallað út skömmu fyrir klukkan átta vegna þakplötu sem var farin að losna af einbýlishúsi í efribyggð. Þá var formlegu skólahaldi í Grunnskóla Vestmannaeyja seinkað til klukkan níu vegna veðursins.