Viðgerð á rafmótor Herjólfs miðar vel, að því er fram kemur í nýrri stöðufærslu frá Herjólfi ohf. Tafir á afhendingu koparvírs urðu hins vegar til þess að viðgerðin dróst á langinn. Nú er unnið af fullum krafti á verkstæði í Hollandi og stefnt að því að henni ljúki um miðjan júlí.

Frá þessu greinir Ólafur Jóhann Borgþórsson, framkvæmdastjóri Herjólfs ohf., í færslu á Facebook-síðu Herjólfs.

Herjólfur hefur undanfarna mánuði siglt á annarri skrúfunni vegna bilunar í öðrum rafmótor ferjunnar. Undanfarnar vikur hefur Baldur sinnt siglingum með Herjólfi til að anna mikilli umferð milli lands og Eyja.

Tekinn úr áætlun í allt að fjóra sólarhringa

Þegar viðgerð á mótornum lýkur verður Herjólfur tekinn úr áætlun á meðan mótorinn verður settur aftur í skipið. Áætlað er að sú vinna taki allt að fjóra sólarhringa.

Á meðan mun Baldur sinna átta ferðum á milli lands og Eyja.

Baldur heldur ekki áfram í Eyjasiglingum

Í færslunni kemur jafnframt fram að Baldur muni snúa aftur til siglinga í Breiðafirði um leið og Herjólfur verður kominn í fullan rekstur.

Ólafur segir jafnframt mikilvægt að leiðrétta þann misskilning sem hafi getað skapast vegna auglýsinga sem birtust fyrr í vikunni. Af þeim hafi mátt ráða að Baldur yrði áfram í áætlunarsiglingum milli lands og Eyja, en svo verði ekki.

Átta ferðir til 23. ágúst

Þegar Herjólfur verður kominn í fullan rekstur mun skipið sigla hefðbundinni átta ferða áætlun til og með 23. ágúst. Eftir það tekur við sjö ferða áætlun.

Að lokum hvetur Herjólfur ohf. fólk til að heimsækja Vestmannaeyjar í sumar og minnir á að „Vestmannaeyjar eru alltaf góð hugmynd.“