Kjarnaborunin á Landeyjasandi vegna rannsókna fyrir fyrirhuguð Eyjagöng er komin niður á 136 metra dýpi. Markmiðið er að bora niður á 300 metra en gert er ráð fyrir að boruninni ljúki í ágúst. Þá er hljóðendurvarpsmælingum í Eyjasundi lokið eftir að alls voru mældir 282 kílómetrar á sjö mælingadögum.

Haraldur Pálsson, framkvæmdastjóri Eyjaganga ehf., segir í samtali við Eyjafréttir að borunin á Landeyjasandi hafi gengið misjafnlega. Bæði hafi komið fram mjög hart berg og talsvert skoltap í holunni. Vegna þess hafi þurft að steypa reglulega í hana.

„Það er tímafrekt þar sem steypan þarf að minnsta kosti 18 tíma til að taka sig,“ segir Haraldur.

Ýmislegt annað hefur tafið verkið. Aðeins tveir eru nú á vakt vegna sumarleyfa en áður voru þeir þrír. Þá hafa veikindi sett strik í reikninginn, skipta hefur þurft um vatnsslöngur í fjörunni og suma daga hefur ekki verið hægt að vinna vegna sandstorma.

Stefnt að verklokum í ágúst

Ekkert verður borað næstu vikuna vegna sumarleyfa. Haraldur segir vonir standa til að hægt verði að ljúka boruninni í ágúst.

Hann segir ekki tímabært að draga ályktanir af því sem komið hefur upp úr holunni. Að borun lokinni verða kjarnarnir rannsakaðir með sama hætti og kjarnarnir úr borholunni í Vestmannaeyjum. Meðal annars verður styrkur bergsins og samlíming þess greind.

Niðurstöðurnar verða síðan nýttar ásamt öðrum rannsóknargögnum við gerð fýsileikamats vegna mögulegra jarðganga milli lands og Eyja.

Mældu 282 kílómetra á sjö dögum

Undirbúningur að hljóðendurvarpsmælingum í Eyjasundi hófst 29. júní þegar hafist var handa við að koma mælibúnaði um borð í rannsóknaskipið Baldur. Búnaðurinn var prófaður að morgni 5. júlí og hófust mælingar síðar sama dag.

Veður, orlof áhafnar Landhelgisgæslunnar og önnur verkefni skipsins settu mælingunum skorður. Aðstæður bötnuðu hins vegar undir lok leiðangursins og tókst að mæla í sex af síðustu sjö dögunum.

Alls urðu mælingadagarnir sjö og voru þá mældir 282 kílómetrar, eða sem samsvarar 152 sjómílum. Síðasti mælingadagurinn var 20. júlí og var búnaðurinn tekinn úr Baldri daginn eftir og sendur aftur til Íslenskra orkurannsókna, ÍSOR, í Kópavogi.

Gögnin teljast vel nothæf

Haraldur segir gögnin misgóð eftir ölduhæð á hverju svæði, enda séu mælingar af þessu tagi mjög viðkvæmar fyrir veðri. Þau teljist þó öll vel nothæf til þeirrar greiningarvinnu sem fram undan er.

Ekki liggja fyrir bráðabirgðaniðurstöður. Um mikið gagnamagn er að ræða sem þarf að hreinsa, greina og túlka og gæti heildarúrvinnslan tekið allt að fjóra mánuði. Sérfræðingar telja að búnaðurinn hafi náð að mæla berglög allt að 300 metra niður undir sjávarbotninn.

Sérfræðingar ÍSOR unnu að mælingunum ásamt Landhelgisgæslunni og hollenska fyrirtækinu GEO Marine Survey Systems.

„Þetta var hreint ótrúlegt teymi sem vann að þessum mælingum undir handleiðslu ÍSOR og eiga þessi fyrirtæki og stofnanir mikið hrós skilið fyrir að skila þessu verki af sér með miklum sóma,“ segir Haraldur.

Hann segir góða tilfinningu að gagnaöflun sé nú lokið í tveimur af þremur rannsóknarstigum ársins.

Halldór B. Halldórsson tók saman stutt myndband af sjómælingaskipinu Baldri á dögunum.