Á þjóðhátíðinni eiga allir sínar hefðir, uppáhaldslög og minningar sem gera hátíðina einstaka. Við heyrðum í nokkrum Eyjamönnum og fengum þau til að svara nokkrum spurningum um þjóðhátíðina, tilhlökkunina, uppáhaldshefðirnar og það sem má ekki vanta í tjaldið.

Nafn: Lilja Dröfn Kristinsdóttir

Fjölskylda: Ég kem úr Ás-ættinni. Móðir mín heitir Magnea Richardsdóttir og faðir minn, heitinn, hét Kristinn Þór Hansson. Maðurinn minn heitir Sigurður og við eigum tvö börn, þau Sigurð Gauta og Emblu Dís.

Hvernig leggst Þjóðhátíðin í þig? Hún leggst ótrúlega vel í mig. Þjóðhátíð er alltaf jafn skemmtileg og hver hátíð hefur sinn einstaka sjarma.

Hversu oft hefur þú farið á Þjóðhátíð? Ég er ekki með nákvæma tölu á því, en þær eru ansi margar. Fyrsta Þjóðhátíðin mín var árið 1990, þegar ég var tveggja ára gömul.

Hvað stendur upp úr á hverju ári? Samveran með fjölskyldu og vinum stendur alltaf upp úr. Börnin mín elska Þjóðhátíð og mig langar svo að þau fái að upplifa hana á sama hátt og ég gerði þegar ég var barn.

Uppáhalds Þjóðhátíðarhefð? Við erum með þema í tjaldinu okkar á hverju ári og það er ótrúlega skemmtileg hefð. Í ár er þemað „Sailor“, þannig að blár, hvítur og rauður verða í aðalhlutverki.

Hvert er uppáhalds Þjóðhátíðarlagið? Það er erfitt að velja bara eitt lag, en Lífið er yndislegt stendur upp úr hjá mér. Það minnir mig á Þjóðhátíðina árið 2001, þegar allt small saman – lagið, veðrið, bekkjabílarnir og einstök stemning. Þá vorum við æskuvinkonurnar á fermingaraldri og nutum hátíðarinnar svo sannarlega.

Hvað má ekki vanta í hvíta tjaldið? Það má aldrei vanta góða skapið og góðar kræsingar. Ég elska líka að rölta um og kíkja inn í hvítu tjöldin og sjá hversu mikinn metnað fólk leggur í skreytingarnar. Sjálfri finnst mér einstaklega gaman að skreyta og dúlla mér við að gera tjaldið okkar notalegt og fallegt.

Góða skemmtun og gleðilega Þjóðhátíð!