Reykjavíkurmaraþon Íslandsbanka, fjölmennasta götuhlaup landsins, fer fram laugardaginn 22. ágúst. Hlaupið hefur verið haldið árlega í miðborg Reykjavíkur frá árinu 1984 og fer að venju fram sömu helgi og Menningarnótt.

Boðið er upp á maraþon, hálfmaraþon, 10 km hlaup og skemmtiskokk. Allar vegalengdir hefjast í Sóleyjargötu og lýkur á Lækjargötu fyrir framan Menntaskólann í Reykjavík.

Reykjavíkurmaraþonið er ekki aðeins ein stærsta íþróttahátíð landsins heldur einnig mikilvægur mannúðarviðburður. Hlauparar geta safnað áheitum til styrktar fjölmörgum góðum málefnum í gegnum Hlaupastyrk.

Fjöldi hlaupara frá Vestmannaeyjum tekur þátt í hlaupinu í ár. Í aðdraganda þess munu Eyjafréttir ræða við nokkra þeirra, kynnast hlaupaferli þeirra og undirbúningi og heyra hvaða markmið þeir hafa sett sér. Þá segja hlaupararnir frá þeim góðu málefnum sem þeir kjósa að styðja.

Fyrsta viðtalið birtist hér á Eyjafréttum á næstu dögum.