Eyjaskipin Vestmannaey VE og Bergey VE halda sínu striki á veiðum. Vestmannaey landaði í Grindavík á sunnudag og í Vestmannaeyjum í dag, en Bergey landaði í Eyjum í gær. Greint er frá þessu á vef Síldarvinnslunnar, þar sem rætt er við skipstjórana.

Egill Guðni Guðnason, skipstjóri á Vestmannaey, segir fyrri túrinn hafa verið hreinræktaðan karfatúr.

„Við vorum með nánast fullt skip á sunnudaginn og aflinn var nær eingöngu karfi sem fékkst í Víkurálnum. Það var bara nudd þar til undir lokin og veðrið var hundleiðinlegt. Við fengum helming aflans á átta tímum í lok túrsins og því bjargaðist þetta,“ segir Egill Guðni.

Eftir löndun var haldið beint til veiða á ný. Veiðar hófust á Gordon og síðan var haldið á Pétursey, Síðugrunn og Ingólfshöfða áður en túrnum lauk á Víkinni.

„Þetta var nudd í þrjá sólarhringa og það þurfti að hafa fyrir þessu. Aflinn var rúm 40 tonn og mjög blandaður; þorskur, ufsi, ýsa, karfi, langa og blálanga,“ segir Egill Guðni.

Jón Valgeirsson, skipstjóri á Bergey, segir síðasta túr hafa verið heldur leiðinlegan. Skipið kom með um 60 tonn að landi eftir fimm sólarhringa á veiðum. Aflinn var blandaður, einkum ýsa, þorskur og ufsi.

„Við vorum fyrir sunnan land og þar var gott veður en lítill afli. Staðreyndin er sú að sjaldan er fiskur á þessum slóðum á þessum árstíma. Veðrið austur frá var hins vegar heldur leiðinlegt og því fórum við ekki þangað,“ segir Jón.

Bergey hóf túrinn á Pétursey og Vík. Þaðan var haldið á Broadway og Brekableiðu, síðan á Ingólfshöfða og Síðugrunnshorn. Túrinum lauk svo aftur á Ingólfshöfða.

„Almennt var veiðin treg, en þó fékkst eitt og eitt þokkalegt hol inn á milli,“ segir Jón. Bæði skip halda aftur til veiða síðar í dag.

Byggt á frétt af vef Síldarvinnslunnar.