Kona á níræðisaldri vann tæpar 130 milljónir króna í Lottó síðasta laugardag. Hún hafði beðið son sinn að kaupa sjálfvalinn miða fyrir sig þegar hann skaust í Fjarðarkaup.

Miðinn reyndist sá eini með allar tölurnar réttar og skilaði konunni öllum sexfalda Lottópottinum. Þetta kemur fram í tilkynningu frá Íslenskri getspá.

Konan vissi ekki af vinningnum fyrr en daginn eftir útdráttinn. Sonur hennar hafði þá séð fréttir af honum og fór í heimsókn til móður sinnar til að fara yfir tölurnar. Þegar ljóst var að hún ætti vinningsmiðann var hann læstur inni í skáp. Fyrst þá voru hin börnin látin vita.

Í tilkynningunni segir að börnin og makar þeirra hafi átt svefnlitla nótt, en konan sagðist sjálf hafa sofið eins og ungabarn. Á mánudag var miðinn sóttur úr skápnum og farið með hann í höfuðstöðvar Íslenskrar getspár, þar sem vinningurinn var staðfestur. Vinningshafinn sagðist enn varla hafa náð að meðtaka tíðindin.