Útflutningsverðmæti sjávarafurða nam um 33 milljörðum króna í september og dróst saman um tæp 7% frá sama mánuði í fyrra. Þrátt fyrir samdráttinn hefur verðmæti útflutnings aukist um 7% á föstu gengi fyrstu níu mánuði ársins.

Þetta kemur fram í greiningu Radarsins á fyrstu bráðabirgðatölum Hagstofu Íslands um vöruskipti í september. Þegar tekið er tillit til gengisbreytinga var samdráttur mánaðarins tæp 6%, en krónan var að jafnaði rúmlega 1% sterkari en í september í fyrra.

Makríllinn vegur þungt

Samdrátturinn skýrist fyrst og fremst af minni útflutningi á heilfrystum fiski. Útflutningsverðmæti hans nam um 5,2 milljörðum króna og dróst saman um 43% á föstu gengi milli ára.

Í greiningu Radarsins er talið að minni makrílútflutningur vegi þar þungt. Makríll stóð undir rúmlega 70% af útflutningsverðmæti heilfrysts fisks í september í fyrra. Makrílafli íslenskra skipa nam um 130 þúsund tonnum í fyrra en er aðeins um 31 þúsund tonn í ár, samhliða verulegum samdrætti í aflaheimildum.

Bráðabirgðatölurnar sýna þó aðeins skiptingu eftir grófum vinnsluflokkum og því liggur ekki enn fyrir sundurliðun eftir fisktegundum.

Aukning í mjöli og lýsi

Þróunin var jákvæðari í flestum öðrum vinnsluflokkum. Á föstu gengi jókst útflutningsverðmæti fiskimjöls um 86% milli ára í september og lýsis um rúm 21%. Aukning í söltuðum og þurrkuðum afurðum var 7% og í frystum flökum 2%.

Verðmæti í flokknum „aðrar sjávarafurðir“ jókst um 65%. Þar falla meðal annars undir loðnuhrogn, sem samkvæmt greiningunni kunna að skýra hluta aukningarinnar.

Á móti dróst útflutningsverðmæti ferskra afurða saman um 8% og rækju um 84%. Verðmæti rækjuútflutnings nam aðeins um 129 milljónum króna og hefur samkvæmt Radarnum ekki verið lægra í einum mánuði á þessari öld. Hráefnisskortur er talinn helsta skýringin.

Útflutningur fyrstu níu mánaða nam 281 milljarði

Útflutningsverðmæti sjávarafurða nam alls 281 milljarði króna á fyrstu níu mánuðum ársins. Það er um 7% aukning á föstu gengi frá sama tímabili í fyrra.

Mest munar um rúmlega 14% aukningu í útflutningsverðmæti heilfrysts fisks, sem Rad­arinn rekur fyrst og fremst til loðnu. Verðmæti frystra flaka jókst um 6% og ferskra afurða um 5%.

Einnig jókst verðmæti útflutnings á söltuðum og þurrkuðum afurðum um 10%, lýsi um 12% og öðrum sjávarafurðum um 16%. Útflutningsverðmæti fiskimjöls dróst hins vegar saman um 2% og rækju um nær helming.