Subsea7 hefur viðurkennt að tjón sem varð á almannavarnalögninni NSL-4 við útlagningu hennar megi rekja til mistaka við framkvæmdina. Þetta kemur fram í frétt á vef Vestmannaeyjabæjar, en málið var til umfjöllunar á fundi bæjarráðs þann 6. október.

Stýrihópur um vatnslagnir fundaði mánudaginn 5. október með forsvarsmönnum Subsea7, fulltrúa Verkís og lögmanni sveitarfélagsins. Þar var farið yfir skýrslu Subsea7 um tjónið.

Samkvæmt frétt bæjarins kemur fram í skýrslunni að ferlar um borð hafi ekki tryggt að útlagning lagnarinnar héldist innan öryggismarka.

Unnið að mati á tjóninu

Eyþór Harðarson, formaður bæjarráðs, segir mjög mikilvægt að vinna málið vel.

„Sem betur fer vorum við með bestu mögulegar tryggingar vegna verkefnisins og nú fara næstu vikur í að vinna mat á tjóninu og koma verkefninu í þann farveg sem upphaflega var lagt af stað með,“ segir Eyþór í fréttinni.